პატრიარქმა შიო III-მ აბიტურიენტები დალოცა და მტკიცე რწმენის, სიმდაბლისა და სიყვარულის მნიშვნელობაზე იქადაგა
სულთმოფენობიდან მეოთხე კვირის ქადაგებაში პატრიარქმა კაპერნაუმელი ასისთავის მაგალითზე განმარტა, როგორ უნდა აღევლინოს ლოცვა, აბიტურიენტებს კი ღვთის შეწევნა და წარმატება უსურვა.
სულთმოფენობიდან მეოთხე კვირას, საკვირაო საღვთო ლიტურგიის დასრულების შემდეგ, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიო III-მმორწმუნეებს ქადაგებით მიმართა. პატრიარქმა დღევანდელი სახარებისეული საკითხავის საფუძველზე ისაუბრა იმ სულიერ მდგომარეობაზე, რომელიც ადამიანს ღვთისადმი ლოცვისას უნდა ჰქონდეს, განსაკუთრებული ყურადღება კი მტკიცე რწმენას, სიმდაბლესა და მოყვასის სიყვარულს დაუთმო.
ქადაგების დასაწყისში შიო III-მ გაიხსენა სახარების ეპიზოდი, რომელიც კაპერნაუმში რომაელი ასისთავისა და მისი მსახურის სასწაულებრივ განკურნებას ეხება. პატრიარქის განმარტებით, მიუხედავად იმისა, რომ ასისთავი წარმართი იყო და რომაული ჯარის წარმომადგენელს წარმოადგენდა, მან გამოავლინა ისეთი რწმენა, რომელიც თავად უფალმა იესო ქრისტემაც განსაკუთრებულად შეაქო.
პატრიარქმა აღნიშნა, რომ როდესაც ასისთავმა მაცხოვარს თავისი მძიმედ დაავადებული მსახურის განკურნება სთხოვა, უფალმა უპასუხა, რომ თავად მივიდოდა მასთან. თუმცა ასისთავმა უდიდესი სიმდაბლით განაცხადა, რომ არ იყო ღირსი, ქრისტე მის სახლში შესულიყო და მხოლოდ მისი სიტყვაც საკმარისი იქნებოდა მსახურის განსაკურნებლად.
როგორც შიო III-მ აღნიშნა, სწორედ ამ რწმენისა და სიმდაბლის გამო თქვა მაცხოვარმა, რომ ისრაელშიც კი ვერ ეპოვა ასეთი ძლიერი სარწმუნოება.
პატრიარქის თქმით, ეს სახარებისეული მაგალითი ყველა ქრისტიანისთვის მნიშვნელოვანი გაკვეთილია.
მისი განმარტებით, როდესაც ადამიანი უფალს ლოცვით მიმართავს, მას არ უნდა ეპარებოდეს ეჭვი ღვთის ყოვლისშემძლეობაში. აუცილებელია, ლოცვა იყოს მტკიცე, უყოყმანო რწმენით აღვლენილი, რადგან, როგორც წმინდა წერილი გვასწავლის, დაეჭვებულ ადამიანს არ უნდა ეგონოს, რომ ღვთისგან რაიმეს მიიღებს.
ამასთანავე, პატრიარქმა განსაკუთრებული ყურადღება თავმდაბლობის მნიშვნელობაზე გაამახვილა. მისი თქმით, მორწმუნემ არასოდეს უნდა ჩათვალოს, რომ საკუთარი დამსახურების გამო იმსახურებს ღვთის წყალობას.
შიო III-მ განმარტა, რომ ამპარტავნება ადამიანს ღმერთს აშორებს, ხოლო სიმდაბლე ღვთის მადლის მიღების გზას უხსნის. სწორედ ამიტომ, ქრისტიანის ლოცვა უნდა იყოს არა საკუთარი ღირსების შეგრძნებით, არამედ ღრმა თავმდაბლობით აღსავსე.
ქადაგებაში ასევე განსაკუთრებული ადგილი დაეთმო მოყვასის სიყვარულს. პატრიარქმა აღნიშნა, რომ ასისთავი უფალს საკუთარი საჭიროებისთვის კი არ მიმართავდა, არამედ თავისი მსახურის გადასარჩენად. ეს, მისი თქმით, მოყვასისადმი ჭეშმარიტი სიყვარულის მაგალითია, რომელსაც მაცხოვარმაც მაშინვე უპასუხა.
ამასთან დაკავშირებით შიო III-მ მორწმუნეებს ერთმანეთისთვის ლოცვისკენ მოუწოდა.
„აუცილებლად უნდა ვილოცოთ ერთმანეთისთვის... ლოცვას არ აქვს არც სივრცის, არც დროის საზღვრები... უნდა ვილოცოთ დიდი რწმენით, უყოყმანო რწმენით და სიყვარულით, თუ გვინდა, უფალმა ეს ლოცვა შეგვისრულოს,“— განაცხადა პატრიარქმა.
ქადაგების დასასრულს პატრიარქმა განსაკუთრებული სიტყვით მიმართა ახალგაზრდებს, რომლებიც უმაღლეს სასწავლებლებში ჩასაბარებლად ეროვნული გამოცდებისთვის ემზადებიან.
შიო III-მ აბიტურიენტებს ღვთის შეწევნა, სულიერი სიმტკიცე და წარმატება უსურვა და აღნიშნა, რომ ცოდნა უდიდესი საუნჯეა, რომელიც ადამიანს ცხოვრების გზაზე წინსვლისა და განვითარების შესაძლებლობას აძლევს.
„ჩვენო ძვირფასო აბიტურიენტებო, გლოცავთ დიდი სიყვარულით. გისურვებთ ღვთის შეწევნას და წარმატებას მისაღებ გამოცდებში, წარმატებით ჩაგებარებინოთ და მოხვედრილიყავით უმაღლეს სასწავლებლებში. გახსოვდეთ, ცოდნა ეს არის ძალიან დიდი საუნჯე, რომელიც ადამიანს ამაღლებს და ცხოვრების გზაზე წინსვლის საშუალებას აძლევს,“— აღნიშნა პატრიარქმა.
ამასთან, მან ახალგაზრდებს შეახსენა, რომ განათლებასთან ერთად ყველაზე მნიშვნელოვანი ღმერთთან სიახლოვეა.
პატრიარქის თქმით, ადამიანის ცხოვრების უმთავრესი მიზანი ღვთის ნების შესრულება, სულიერი ცხოვრება და ქრისტიანული სათნოებების განმტკიცებაა, რადგან, როგორც მაცხოვარი გვასწავლის, „ჯერ ეძიებდით სასუფეველსა ღმრთისასა და სიმართლესა მისსა, და ეს ყოველივე შეგეძინებათ თქვენ.“
შიო III-მ ასევე აღნიშნა, რომ წლევანდელი მისაღები გამოცდები განსაკუთრებულ წელს ტარდება — საქართველოში ქრისტიანობის სახელმწიფო რელიგიად გამოცხადების 1700 წლის იუბილესთან დაკავშირებით. ამ საიუბილეო თარიღის აღსანიშნავად აბიტურიენტებს ლოცვა-კურთხევის ნიშნად სპეციალური საიუბილეო ჯვრები გადაეცემათ, რომლებიც, პატრიარქის თქმით, მათთვის ღვთის კურთხევისა და შეწევნის სიმბოლო იქნება.
ქადაგების დასასრულს სრულიად საქართველოს კათოლიკოს-პატრიარქმა ციმინტიების გვარი დალოცა, ხოლო სრულიად საქართველოს, ახალგაზრდებსა და მორწმუნეებს ღვთის წყალობა, გაძლიერება და სულიერი წარმატება უსურვა.
ადრე მართლმადიდებელ ჟურნალისტთა კავშირი წერდა, შიო III 28 ივნისს აბიტურიენტებს დალოცავს.
