მიხეილ ყაველაშვილმა წმინდა მატათა მოციქულის სახელობის კომპლექსი მოინახულა
ბათუმისა და ლაზეთის მიტროპოლიტმა დიმიტრიმ სტუმრებს კომპლექსის საგანმანათლებლო და სამონასტრო სივრცეები, მიმდინარე პროექტები და განვითარების გეგმები გააცნო.
საქართველოს პრეზიდენტმა, მიხეილ ყაველაშვილმა და პირველმა ლედიმ, თამარ ბაგრატიონმა ბათუმში წმინდა მატათა მოციქულის სახელობის საეკლესიო კომპლექსი მოინახულეს. ინფორმაციას პრეზიდენტის ადმინისტრაცია ავრცელებს.
ვიზიტში აჭარის ავტონომიური რესპუბლიკის მთავრობის თავმჯდომარე და მისი მეუღლეც მონაწილეობდნენ. სტუმრებს ბათუმისა და ლაზეთის მიტროპოლიტმა დიმიტრიმ უმასპინძლა და კომპლექსის ინფრასტრუქტურა, მიმდინარე და დაგეგმილი პროექტები, ასევე განვითარების სამომავლო გეგმები გააცნო.
პრეზიდენტმა და პირველმა ლედიმ კომპლექსის ბაზაზე მოქმედი წმინდა მატათა მოციქულის სახელობის გიმნაზიაც დაათვალიერეს. სასწავლებელი 2022 წლიდან ფუნქციონირებს და ამჟამად 120-მდე მოსწავლეს აერთიანებს.
სტუმრებმა გიმნაზიის საგანმანათლებლო და სახელოვნებო სივრცეები, მათ შორის კინოთეატრი და მოზაიკის სახელოსნო მოინახულეს. პრეზიდენტის ადმინისტრაციის ცნობით, სასწავლებელში აკადემიურ განათლებასთან ერთად განსაკუთრებული ყურადღება მოზარდთა სულიერ აღზრდასა და შემოქმედებითი უნარების განვითარებას ეთმობა.
წმინდა მატათა მოციქულის სახელობის საეკლესიო კომპლექსი საგანმანათლებლო და სამონასტრო სივრცეებს აერთიანებს და ახალგაზრდა თაობის სულიერ, ინტელექტუალურ და შემოქმედებით აღზრდას ემსახურება.
მართლმადიდებელ ჟურნალისტთა კავშირი წერდა, საქართველოს პრეზიდენტი მილოცვის წერილს აქვეყნებს.
