106-ე საჯარო სკოლის მოსწავლეებმა წმ. თომას ტაძრის ეზოში კვიპაროსები დარგეს
გამწვანების ღონისძიებაში „ღირებულებითი განათლების“ კლუბის წევრები, დეკანოზი თეოდორე ფარნაშვილი და საპატრიარქოს ფონდი „გაამწვანე საქართველო“ მონაწილეობდნენ.
თბილისის 106-ე საჯარო სკოლის „ღირებულებითი განათლების“ კლუბის მოსწავლეებმა, კლუბის ხელმძღვანელთან, დეკანოზ თეოდორე ფარნაშვილთან ერთად, სამგორის რაიონში მდებარე წმინდა თომა მოციქულის სახელობის ტაძრის ეზოში კვიპაროსები დარგეს. გამწვანების ღონისძიება საპატრიარქოს ფონდ „გაამწვანე საქართველოსთან“ თანამშრომლობით განხორციელდა.
მოსწავლეები ტაძრის ეზოს გამწვანებაში უშუალოდ ჩაერთნენ. მსგავსი საქმიანობა ახალგაზრდებში გარემოზე ზრუნვის, პასუხისმგებლობისა და ერთობლივი შრომის მნიშვნელობის გააზრებას უწყობს ხელს.
პროექტი „ღირებულებითი განათლება“ სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსისა და ბიჭვინთისა და ცხუმ-აფხაზეთის მიტროპოლიტის, შიო III-ის ლოცვა-კურთხევით მიმდინარეობს.
პროექტი საქართველოს საპატრიარქოს საზოგადოებასთან ურთიერთობის სამსახურის ორგანიზებითა და საქართველოს განათლების, მეცნიერებისა და ახალგაზრდობის სამინისტროს მხარდაჭერით ხორციელდება. ამ ეტაპზე „ღირებულებითი განათლების“ კლუბები 430 საჯარო სკოლაშია შექმნილი.
მართლმადიდებელ ჟურნალისტთა კავშირი წერდა, საპატრიარქოს ახალგაზრდულ სახლში „ღირებულებითი განათლების“ კლუბი ჩამოყალიბდა.
