როგორია პატრიარქის არჩევის პროცედურა საქართველოს მართლმადიდებლურ ეკლესიაში?
საქართველოს ახალი პატრიარქი საქართველოს მართლმადიდებლური ეკლესიის გაფართოებულმა კრებამ უნდა აირჩიოს.
საქართველოს მართლმადიდებლური ეკლესიის ადმინისტრირების წესდების თანახმად, საპატრიარქო ტახტის მოსაყდრე ვალდებულია კრება მოიწვიოს არაუადრეს ორმოცი დღისა და არაუგვიანეს ორი თვისა.
გაფართოებულ კრებამდე, პატრიარქობის კანდიდატების შესარჩევად, წმინდა სინოდის სხდომა გაიმართება.
საქართველოს პატრიარქობის კანდიდატი უნდა აკმაყოფილებდეს შემდეგ კრიტერიუმებს: ის უნდა იყოს ქართული ეროვნების, საქართველოს მართლმადიდებლური ეკლესიის ეპისკოპოსი, ჰქონდეს თეოლოგიური განათლება და ეკლესიის მმართველობის მნიშვნელოვანი გამოცდილება, იყოს ორმოციდან სამოცდაათ წლამდე ასაკის და იყოს ბერი.
წმინდა სინოდი შეარჩევს სამ კანდიდატს გაფართოებულ კრებაზე წარსადგენად.
სინოდის თითოეულ წევრს უფლება აქვს წარადგინოს ერთი პატრიარქობის კანდიდატი, მათ შორის საკუთარი თავი. სამი ეპისკოპოსი, რომლებიც სინოდზე ყველაზე მეტ ხმას მიიღებენ, გაფართოებულ კრებაზე საპატრიარქოს კანდიდატებად იყრიან კენჭს.
თუ პირველ ტურში ვერც ერთი კანდიდატი ვერ მიიღებს ხმების ნახევარზე მეტს, ჩატარდება მეორე კენჭისყრა, რომელშიც მონაწილეობას მიიღებს ის ორი კანდიდატი, რომლებმაც პირველ ტურში ყველაზე მეტი ხმა მიიღეს.
პატრიარქის არჩევის კენჭისყრაში მონაწილეობის უფლება მხოლოდ ეპისკოპოსებს აქვთ. საქართველოს პატრიარქად არჩეულად ჩაითვლება ის კანდიდატი, რომელიც მიიღებს კრებაზე დამსწრე ეპისკოპოსების მიერ მიცემული ხმების ნახევარზე მეტს.
საქართველოს პატრიარქის არჩევის პროცედურა განსაზღვრულია „საქართველოს მართლმადიდებლური ეკლესიის ადმინისტრირების შესახებ“ დებულებით, რომელიც მიღებულ იქნა საქართველოს მართლმადიდებლური ეკლესიის მეცამეტე გაფართოებულ კრებაზე, რომელიც ჩატარდა სვეტიცხოვლის საკათედრო ტაძარში 1995 წლის 18-19 სექტემბერს.
ახალი პატრიარქის არჩევამდე ეკლესიის მმართველობას ხელმძღვანელობს საპატრიარქო ტახტის მოსაყდრე. მიტროპოლიტი შიო (მუჯირი) მოსაყდრედ თანამდებობას იკავებს 2017 წლის 23 ნოემბრიდან.
მართლმადიდებელ ჟურნალისტთა კავშირი წერდა, გარდაიცვალა სრულიად საქართველოს კათოლიკოს-პატრიარქი ილია II.
