საიუბილეო კრებულის წარდგენა თბილისის სასულიერო აკადემიაში გაიმართება
გამოცემა ეძღვნება საქართველოს გაქრისტიანებისა და ნიკეის I მსოფლიო საეკლესიო კრების 1700 წლისთავს.
16 დეკემბერს თბილისის სასულიერო აკადემიასა და სემინარიაში გაიმართა საქართველოს საპატრიარქოს მიერ გამოცემული საიუბილეო კრებულის „საღვთისმეტყველო მოზაიკა“ წარდგენა. გამოცემა წარმოადგენს თეოლოგიური ნაშრომების ანთოლოგიას და ეძღვნება საქართველოს გაქრისტიანებისა და ნიკეის I მსოფლიო საეკლესიო კრების 1700 წლისთავს.
კრებულის შემდგენელი და რედაქტორია თბილისის სასულიერო აკადემიისა და სემინარიის პედაგოგი, ისტორიის დოქტორი, დეკანოზი თეიმურაზ თათარიშვილი, რომელმაც წიგნს დაურთო სქოლიოები და ცნობები კრებულში წარმოდგენილი ავტორებისა და ნაშრომების შესახებ.
„საღვთისმეტყველო მოზაიკა“ თემატურად დალაგებული წერილებისა და კვლევების კრებულია. შესავალში წარმოდგენილია ნაშრომები ცოდნისა და რწმენის, სულიერი ღირებულებების, ქრისტიანობის არსის, რელიგიისა და ფილოსოფიის შესახებ. განსაკუთრებით ვრცლად არის წარმოდგენილი ბიბლეისტიკის განყოფილება, ხოლო ბიბლიოლოგიის ნაწილში განხილულია წმინდა წიგნების სტრუქტურა, თარგმანები, ხელნაწერები და აპოკრიფები.
საიუბილეო გამოცემა აერთიანებს ჰარვარდის, კემბრიჯისა და სხვა წამყვანი უნივერსიტეტების პროფესორთა წერილებს ძველი აღთქმის რედაქციებისა და უძველესი თარგმანების, აგრეთვე მკვდარი ზღვის რეგიონში აღმოჩენილი ხელნაწერების შესახებ. კრებულში შეტანილია ციალა ქურციკიძის ეპოქალური ნაშრომი ბიბლიის ქართული თარგმანებისა და რედაქციების თაობაზე, ედიშერ ჭელიძის „ბიბლია და ქრისტიანობა“, რ. სირაძის „ბიბლია და ქართული მწერლობა“ და სხვა მნიშვნელოვანი ნაშრომები.
წიგნში ფართოდ არის წარმოდგენილი ეკლესიის ისტორიის, დოგმატური ღვთისმეტყველების, პატროლოგიისა და ლიტურგიკის განყოფილებები. ანთროპოლოგიის ნაწილში განხილულია ადამიანის რაობის, სხეულის, სულისა და სამშვინველის, ასევე ხატებისა და მსგავსების თემები. ცალკე განყოფილება ეთმობა ქრისტიანულ ხელოვნებას.
კრებულში დაბეჭდილია თავად დეკანოზ თეიმურაზ თათარიშვილის ვრცელი ნაშრომი „ბიბლია და მსოფლიო ლიტერატურა“, აგრეთვე ნ. ბერდიაევის, ვ. ლოსკის, დ. ამუსინის, ა. მენის, ზ. კიკნაძის, დ. თუმანიშვილისა და სხვა ავტორთა ტექსტები.
როგორც მამა თეიმურაზმა აღნიშნა, „საღვთისმეტყველო მოზაიკა“ შეიძლება ჩაითვალოს მართლმადიდებლის სამაგიდო წიგნად და თეოლოგიის ერთგვარ ენციკლოპედიურ მრავალთავად.
წიგნის წარდგენას ესწრებოდნენ თბილისის სასულიერო აკადემიისა და სემინარიის სტუდენტები და პროფესორ-მასწავლებლები.
მართლმადიდებელ ჟურნალისტთა კავშირი წერდა, წმინდა დიდმოწამე ბარბარე — ზეციური სიბრძნის მიერ განსწავლული ქალწული და ქრისტესთვის წამებული.
