შინდისის გმირების მემორიალთან ქართველი ჯარისკაცების ხსოვნას პატივი მიაგეს
გორისა და ატენის მიტროპოლიტმა ანდრიამ შინდისის ბრძოლაში დაღუპული გმირების სახელზე პანაშვიდი გადაიხადა.
სამშაბათს, 11 აგვისტოს, სოფელ შინდისში, 2008 წლის აგვისტოს ომში გმირულად დაღუპული ქართველი სამხედრო მოსამსახურეების მემორიალთან პანაშვიდი გაიმართა.
პანაშვიდი გორისა და ატენის მიტროპოლიტმა ანდრიამ გადაიხადა. სასულიერო პირებმა ლოცვით მოიხსენიეს სამშობლოსთვის დაღუპული ქართველი ჯარისკაცები და პატივი მიაგეს მათ ხსოვნას.
ღონისძიებას საქართველოს პრეზიდენტი მიხეილ ყაველაშვილი და საქართველოს პრემიერ-მინისტრი ირაკლი კობახიძე ესწრებოდნენ.
შინდისის ბრძოლა 2008 წლის 11 აგვისტოს, რუსეთ-საქართველოს ომის მიმდინარეობისას, სოფელ შინდისთან გაიმართა. ბრძოლაში საქართველოს შეიარაღებული ძალების 17 სამხედრო მოსამსახურე დაიღუპა. მათი გმირობა საქართველოს უახლესი ისტორიის ერთ-ერთ გამორჩეულ მაგალითად რჩება.
ყოველწლიურად, 11 აგვისტოს, შინდისში დაღუპული გმირების ხსოვნას პატივს მიაგებენ და სამშობლოსთვის თავდადებულ სამხედრო მოსამსახურეებს ლოცვით მოიხსენიებენ.
მართლმადიდებელ ჟურნალისტთა კავშირი ადრე წერდა, 8 აგვისტოს ეკლესია 2008 წლის ომში დაღუპულთა სულებისთვის ლოცვას აღავლენს.
