მართლმადიდებელი ეკლესია 6 მაისს წმინდა დიდმოწამე გიორგის ხსენების დღეს აღნიშნავს
საქართველოს მფარველად მიჩნეული წმინდანის აღსრულების დღე ეკლესიაში განსაკუთრებული პატივით აღინიშნება.
მართლმადიდებელი ეკლესია 6 მაისს წმინდა დიდმოწამე გიორგის აღსრულების დღეს აღნიშნავს. წმინდა გიორგი, რომელსაც ქართველ ერში განსაკუთრებული სიყვარულითა და პატივით მოიხსენიებენ, ქვეყნის მფარველად მიიჩნევა და მისი ხსენება საზეიმოდ აღინიშნება მთელ საქართველოში.
წმინდა დიდმოწამე გიორგი მესამე საუკუნის მეორე ნახევარში, კაბადოკიაში, შეძლებულ ქრისტიანულ ოჯახში დაიბადა. იგი რომის იმპერატორ დიოკლიტიანეს დროს მხედართმთავარი გახდა, თუმცა ქრისტიანთა დევნის დაწყებისას საჯაროდ აღუდგა წინ იმპერატორს და ქრისტიანული სარწმუნოება არ უარყო.
გადმოცემის მიხედვით, წმინდა გიორგიმ მრავალი მძიმე წამება დაითმინა, მათ შორის ბორბალზე გაკვრა, თუმცა რწმენა არ დაუთმია. საბოლოოდ, 303 წელს, 30 წლის ასაკში, მას თავი მოკვეთეს. ეკლესიის ისტორიაში იგი შევიდა როგორც ძლევაშემოსილი და უძლეველი ზეციური მხედარი.
წმინდა გიორგის კულტი ფართოდ არის გავრცელებული მთელ მსოფლიოში. მას პატივს მიაგებენ არა მხოლოდ მართლმადიდებლები, არამედ სხვადასხვა ქრისტიანული კონფესიის წარმომადგენლები — კათოლიკეები, პროტესტანტები, გრიგორიანელები და სხვები. წმინდანის შესახებ ცნობები ისლამურ წყაროებშიც გვხვდება.
მართლმადიდებელი ეკლესია წმინდა გიორგის ხსენებას წელიწადში ორჯერ აღნიშნავს: 6 მაისს — მისი აღსრულების დღეს და 23 ნოემბერს — ბორბალზე წამების დღეს.
მორწმუნეები ამ დღეს ტაძრებში იკრიბებიან და წმინდანის მეოხებას შესთხოვენ. წმინდა დიდმოწამე გიორგისადმი მიძღვნილი დღესასწაული საქართველოში ერთ-ერთ გამორჩეულ და საყვარელ საეკლესიო დღედ რჩება.
მართლმადიდებელ ჟურნალისტთა კავშირი წერდა, 5 მაისი ღირსი ვიტალის ხსენების დღეა.
