6 იანვარს მართლმადიდებელი ეკლესია ღირსმოწამე ევგენიას ხსენებას აღნიშნავს
ქრისტესთვის თავდადებული ქალწული, რომელმაც მრავალი წამება დაითმინა და ქრისტეშობის დღეს მოწამეობრივად აღესრულა.
მართლმადიდებელი სამოციქულო ეკლესია 6 იანვარს ღირსმოწამე ევგენიას ხსენების დღეს აღნიშნავს. წმინდა ევგენია წარმოშობით რომაელი იყო, თუმცა ალექსანდრიაში იზრდებოდა, სადაც მისი მამა, ფილიპე, იმპერატორ კომოდუსის მიერ ეგვიპტის ეპარქოსად იყო დანიშნული.
ევგენიამ მიიღო შესანიშნავი განათლება და გამოირჩეოდა სიწმინდითა და ზნეკეთილობით. მიუხედავად მრავალი მდიდარი და დიდებული საქმროს სურვილისა, ნეტარმა ქორწინებაზე უარი თქვა. პავლე მოციქულის ეპისტოლეების წაკითხვის შემდეგ მან ირწმუნა ქრისტე, მამაკაცის სამოსელი გადაიცვა და მონებთან — პროტიოსთან და იაკინთესთან ერთად მოინათლა. იგი ევგენის სახელით მოღვაწეობდა, რათა ქრისტიანული ცხოვრების გზა მშვიდად გაევლო.
დაუცხრომელი სულიერი ღვაწლით წმინდანმა კურნების ნიჭი მოიპოვა, თუმცა ცილისწამებისა და დევნის გზით მძიმე განსაცდელებს შეეჯახა. საბოლოოდ, ევგენია იძულებული გახდა, მამამისის წინაშე თავისი საიდუმლო გაემჟღავნებინა, რის შემდეგაც მთელი ოჯახი ქრისტიანობაზე მოექცა.
მოგვიანებით, რომში დაბრუნებულმა წმინდა ევგენიამ მრავალი ადამიანი მოაქცია ქრისტიანობაზე. იმპერატორ გალიენუსის დროინდელი დევნისას იგი და მისი თანამოსაგრეები სასტიკ წამებებს დაექვემდებარნენ. წმინდანი უვნებლად გადაურჩა წყალსა და ცეცხლს, ბოლოს კი, მაცხოვრის გამოცხადების შემდეგ, ქრისტეშობის დღეს, 262 წელს, მოწამეობრივად აღესრულა.
მართლმადიდებელ ჟურნალისტთა კავშირი წერდა, ქარელში ქრისტეს შობის სადღესასწაულო ღვთისმსახურება აღესრულება.
