გიორგი გულიაშვილის მიერ შესრულებული „მღვდელმოქმედებები“ არაკანონიკურია
ეკლესიის განცხადებით, გიორგი გულიაშვილი ამჯერად თავს „უკრაინის მართლმადიდებელი ეკლესია – კიევის საპატრიარქოს“ მღვდელმსახურად წარადგენს.
საქართველოს მართლმადიდებელი ეკლესია მრევლს აფრთხილებს, რომ გიორგი გულიაშვილი, რომელიც გარკვეული პერიოდის წინ თვითმარქვია სასულიერო პირად იყო მხილებული, ამჯერად თავს „უკრაინის მართლმადიდებელი ეკლესია – კიევის საპატრიარქოს“ მღვდელმსახურად აცხადებს.
ეკლესიის ინფორმაციით, სოციალურ ქსელში ვრცელდება ვიდეოკადრებიც, რომლებშიც აღნიშნული პიროვნება ე.წ. მღვდელმოქმედებებს ასრულებს.
განცხადებაში განმარტებულია, რომ „უკრაინის მართლმადიდებელი ეკლესია – კიევის საპატრიარქო“ უკრაინაში მოქმედი სქიზმატური დაჯგუფებაა, რომელსაც არცერთი ადგილობრივი მართლმადიდებელი ეკლესია, მათ შორის, საქართველოს მართლმადიდებელი ეკლესია არ აღიარებს.
ამასთან, აღნიშნულ დაჯგუფებას ემიჯნება კონსტანტინოპოლის საპატრიარქოს მიერ ავტოკეფალურად აღიარებული უკრაინის მართლმადიდებელი ეკლესიაც. მისი ოფიციალური განმარტებით, ე.წ. კიევის საპატრიარქოს დამოუკიდებელი არსებობა კანონიკურად უსაფუძვლოა.
საქართველოს მართლმადიდებელი ეკლესიის განცხადებით, ამ დაჯგუფების მიერ შესრულებულ ხელდასხმებს მართლმადიდებლურ საეკლესიო სივრცეში არანაირი ძალმოსილება არ გააჩნია.
„ასე რომ, გიორგი გულიაშვილის მიერ ჩატარებული ყველა „მღვდელმოქმედება“ ასევე არაკანონიკურია და მოკლებულია რაიმე აღიარებას ან ძალმოსილებას“, – ნათქვამია განცხადებაში.
მართლმადიდებელ ჟურნალისტთა კავშირი წერდა, ინფორმაცია თვითმარქვია სასულიერო პირის შესახებ.
