„დავითიანნის“ ახალგაზრდებმა გუნდურობის შესახებ შეხვედრები გამართეს
საპატრიარქოსთან არსებული ორგანიზაციის ახალგაზრდები საინიციატივო ჯგუფებად გაერთიანდნენ და პირველ პროექტებზე მუშაობას შეუდგნენ.
საპატრიარქოსთან არსებული ორგანიზაცია „დავითიანნის“ ახალგაზრდებისთვის გუნდურობისა და ლიდერობის თემაზე ორი შეხვედრა გაიმართა.
შეხვედრების ფარგლებში მონაწილეებმა იმსჯელეს, თუ რა აერთიანებს ადამიანებს ნამდვილ გუნდად და რამდენად მნიშვნელოვანია საერთო მიზნის მისაღწევად ნდობა, ურთიერთმხარდაჭერა და თანამშრომლობა.
თეორიულ განხილვასთან ერთად, ახალგაზრდებმა მონაწილეობა მიიღეს სხვადასხვა გუნდურ აქტივობასა და ენერგიულ სავარჯიშოში, რომელთა საშუალებითაც თანამშრომლობის მნიშვნელობა პრაქტიკულადაც გამოსცადეს.
განსაკუთრებული ყურადღება დაეთმო ლიდერობასა და მის სხვადასხვა სტილს. მონაწილეებმა განიხილეს განსხვავება ხელმძღვანელსა და ლიდერს შორის და სიმულაციური აქტივობის საშუალებით დააკვირდნენ, თუ როგორ აისახება ლიდერობის განსხვავებული მიდგომები გუნდის მუშაობაზე.
შეხვედრების შედეგად ახალგაზრდები საინიციატივო ჯგუფებად დაიყვნენ და უკვე პირველ ინიციატივებს გეგმავენ, რომელთა განხორციელებასაც „დავითიანნთან“ თანამშრომლობით აპირებენ.
ორგანიზაციის მიზანია ახალგაზრდებში გუნდური მუშაობის,
პასუხისმგებლობისა და ლიდერული უნარების განვითარება, რათა მათ საკუთარი იდეებითა და ინიციატივებით საზოგადოებრივ ცხოვრებაში აქტიური მონაწილეობა შეძლონ.
მართლმადიდებელ ჟურნალისტთა კავშირი წერდა: „დავითიანნსა“ და ქართულ უნივერსიტეტს შორის მემორანდუმი გაფორმდა.
