30 იანვარს მართლმადიდებელი ეკლესია ღირსი ანტონი დიდის ხსენებას აღნიშნავს
უდაბნოს მამა, მონაზვნობის ფუძემდებელი და სულიერი ბრძოლის მაგალითი ქრისტიანთათვის.
30 იანვარს მართლმადიდებელი სამოციქულო ეკლესია ღირსი მამის, ანტონი დიდის ხსენების დღეს აღნიშნავს. წმიდა ანტონი 251 წელს ეგვიპტეში, სოფელ კომაში, კეთილმსახური ქრისტიანების ოჯახში დაიბადა. მშობლების გარდაცვალების შემდეგ მან მთელი ქონება გლახაკებს დაურიგა, უმცროსი და ღვთისმოშიშ ქალწულებს მიანდო აღსაზრდელად, თავად კი მოსაგრე ცხოვრებას შეუდგა.
ანტონი დიდმა ახალგაზრდობიდანვე აირჩია ასკეტური გზა — ცხოვრობდა ლოცვით, მარხვითა და შრომით, საკუთარი შრომის ნაყოფით ირჩენდა თავს და მოწყალებას გასცემდა. იგი გულმოდგინედ ასრულებდა უფლის მცნებებს, წმიდა წერილს ზეპირად სწავლობდა და სულიერი გამოცდილების მისაღებად სხვა ბერებსაც სტუმრობდა.
ღვთისმოყვარე მამამ მძიმე სულიერი ბრძოლები გადაიტანა. ეშმაკი მრავალგვარი განსაცდელით ებრძოდა მას, თუმცა წმიდა ანტონი სიმტკიცით, ლოცვითა და ჯვრის ძალით სძლევდა ბოროტ სულებს. საბოლოოდ მან თებაიდის უდაბნოში განმარტოებული ცხოვრება აირჩია და იქ სრულ მდუმარებაში 20 წელი დაჰყო.
წმიდანის სულიერმა ავტორიტეტმა მრავალი მოწაფე მიიზიდა. იგი სიყვარულით მოძღვრავდა მათ და მონაზვნური ცხოვრების ფუძემდებლად იქცა. დევნის ჟამს ანტონი დიდი ალექსანდრიაში ჩავიდა და ღიად ემსახურებოდა დევნილ ქრისტიანებს. მოგვიანებით იგი მართლმადიდებლური სარწმუნოების დასაცავადაც გამოვიდა არიანელთა და სხვა ცრუ მოძღვრებების წინააღმდეგ.
ღირსმა ანტონიმ 105 წელი იცხოვრა და 357 წელს მშვიდობით მიიცვალა. მისი ცხოვრება დეტალურად აღწერა წმიდა ათანასე ალექსანდრიელმა — ეს თხზულება მართლმადიდებლური აგიოგრაფიის ერთ-ერთ უმნიშვნელოვანეს ძეგლად ითვლება.
მართლმადიდებელ ჟურნალისტთა კავშირი წერდა, 29 იანვარს მართლმადიდებელი ეკლესია იხსენებს სიწმინდეს, რომელიც მოციქულ პეტრეს უკავშირდება.
