29 იანვარს მართლმადიდებელი ეკლესია იხსენებს სიწმინდეს, რომელიც მოციქულ პეტრეს უკავშირდება
თაყვანისცემა პატიოსანთა ჯაჭვთა წმიდისა და ყოვლადქებულისა მოციქულისა პეტრესა.
მართლმადიდებელი ეკლესია 16 იანვარს განსაკუთრებული პატივით აღნიშნავს პატიოსანთა ჯაჭვთა თაყვანისცემას წმიდისა და ყოვლადქებულისა მოციქულისა პეტრესა. ეს სიწმინდე უკავშირდება იმ სასწაულებრივ მოვლენას, როდესაც მოციქული პეტრე ქრისტეს სიტყვის ქადაგების გამო, ჰეროდე აგრიპას ბრძანებით, საპყრობილეში იქნა გამომწყვდეული.
წმინდა წერილის მიხედვით, პეტრე მოციქული ჯაჭვებით შეკრული საკანში იმყოფებოდა, ხოლო ეკლესია გულმოდგინედ ლოცულობდა მისთვის. უფლის ანგელოზის გამოცხადებით მოხდა სასწაული — ნათელი გამობრწყინდა საპყრობილეში, ანგელოზმა გააღვიძა მოციქული და ჯაჭვები თავისით დასცვივდა მის ხელთაგან. დახშული კარების გავლით პეტრე თავისუფლებაში გამოვიდა (საქმე მოციქულთა 12).
ქრისტიანებმა ეს ჯაჭვები მოიპოვეს და სიწმინდედ შეინახეს. მათთან რწმენით მისულნი სხვადასხვა სნეულებისგან იღებდნენ კურნებას. თავდაპირველად ჯაჭვები იერუსალიმში ინახებოდა პატრიარქ იუბენალის დრომდე, შემდეგ კი ისინი გადაეცა თეოდოსი უმცროსის მეუღლეს — ევდოკიას. სიწმინდე კონსტანტინეპოლში იქნა გადატანილი, ხოლო მოგვიანებით ერთი ჯაჭვი ევდოკიამ თავის ასულს, ევდუქსიას გაუგზავნა.
ევდუქსიამ რომში წმინდა პეტრე მოციქულის სახელობის ტაძარი ააგო და იქ დაასვენა სიწმინდე. რომში ასევე ინახებოდა ის ჯაჭვებიც, რომლითაც მოციქული პეტრე თავისი ნეტარი აღსასრულის წინ იყო შეკრული. ყოველწლიურად, 16 იანვარს, ეს სიწმინდეები გამოაბრძანებდნენ ხოლმე თაყვანისსაცემად, რათა მორწმუნეებს ლოცვითა და რწმენით მიახლოების შესაძლებლობა ჰქონოდათ.
მართლმადიდებელ ჟურნალისტთა კავშირი წერდა, 28 იანვარს მართლმადიდებელი ეკლესია ღირსი პავლე თებაიდელის ხსენების დღეს აღნიშნავს.
