23 ოქტომბერს ღირსი ამბროსი ოპტელის ხსენების დღეა
სულიერი მამა, რომელმაც სიცოცხლე სიყვარულისა და თავმდაბლობის მაგალითად აქცია.
23 ოქტომბერს მართლმადიდებელი ეკლესია იხსენებს ღირს მამა ამბროსი ოპტელს, ერთ-ერთ უდიდეს სულიერ მოძღვარს, რომელიც თავისი მოღვაწეობითა და მორჩილებით ოპტინის უდაბნოს სულიერ სიმაღლედ იქცა.
მომავალი წმინდანი, ერში ალექსანდრე გრენკოვი, 1812 წლის 23 ნოემბერს ტამბოვის გუბერნიაში, ღვთისმოსავ ოჯახში დაიბადა. ადრეული ასაკიდანვე ეკლესიასთან დაკავშირებული ბავშვი მღელვარე და გულმხურვალე ბუნებით გამოირჩეოდა. ახალგაზრდა ასაკში გადატანილმა მძიმე ავადმყოფობამ მისი ცხოვრება სრულიად შეცვალა — აღთქმა დადო, რომ განკურნების შემთხვევაში მონასტერში წავიდოდა, და ასე დაიწყო მისი გზა ღვთის მსახურებაში.
1839 წელს ის ოპტინის უდაბნოში მივიდა, სადაც ღირსმა ლევმა მიიღო და მალევე აღიკვეცა ბერად ამბროსის სახელით, წმინდა ამბროსი მედიოლანელის პატივსაცემად. მოგვიანებით ის მღვდელ-მონაზვნად დაედგინათ და ღირსი მაკარის თანამოღვაწე გახდა. სწორედ ამ პერიოდში ჩამოყალიბდა მამა ამბროსი, როგორც სულიერი მამა, რომელმაც ღრმა სიბრძნით, სიყვარულითა და გამორჩეული სიმდაბლით უამრავი ადამიანი მოაქცია ქრისტეს გზაზე.
მიუხედავად მძიმე და ხანგრძლივი სნეულებებისა, ღირსი ამბროსი დაუღალავად იღვწოდა მონასტრის ძმების და მრავალი მომსვლელის სულიერი კეთილდღეობისთვის. მისი კურთხევით გამოიცა მრავალი წმიდა მამათა თხზულება, ხოლო თავისი თანაგრძნობითა და გულისხმიერებით განსაკუთრებით ზრუნავდა გაჭირვებულებზე, ქვრივებზე და ობლებზე.
წმინდანის მფარველობითა და ლოცვით მრავალი სასწაული აღესრულა, და მისთანა ნუგეშის მოსაძებნად ოპტინაში მოდიოდნენ არა მხოლოდ უბრალო ხალხი, არამედ ცნობილი მწერლები და მოაზროვნეები, მათ შორის დოსტოევსკი, ლეონტიევი და ტოლსტოი.
ღირსი ამბროსი გარდაიცვალა 1891 წლის 10 ოქტომბერს შამორდინის დედათა მონასტერში, რომლის დაარსებაშიც თავად ჰქონდა დიდი წვლილი. წმიდანი დაკრძალულია ოპტინის უდაბნოში, ღირსი მაკარის გვერდით, სწორედ ისე, როგორც სიცოცხლეში სურდა.
მის საფლავზე ამოტვიფრულია პავლე მოციქულის სიტყვები:
„ყოველთა ვექმენ ყოვლად, რაითა ყოველნი ვაცხოვნე.“
ეს სიტყვები სრულად ასახავს ღირსი ამბროსის ცხოვრების მთავარ მიზანს, ყოველ ადამიანს ქრისტეს სიყვარულამდე მიყვანას.
მართლმადიდებელ ჟურნალისტთა კავშირმა ადრე გაავრცელა ინფორმაცია, რომ ათონელმა ბერებმა დუმენკოს ათონის მთაზე ვიზიტი გააპროტესტეს.
