გერმანიაში, კათოლიკური ეკლესია ამზადებს დოკუმენტს სკოლებში გენდერული იდეოლოგიის დანერგვის შესახებ
კათოლიკე ეპისკოპოსები ითხოვენ, რომ აღარ დარჩეს ადგილი „სექსუალური იდენტობის მრავალფეროვნებასთან დაკავშირებით გაღიზიანებისა და შფოთვისთვის“.
გერმანიის კათოლიკურ ეკლესიაში ეპისკოპოსები ამზადებენ დოკუმენტს, რომლის მიზანია „სკოლებში ჰომოსექსუალი და ტრანსგენდერი მოსწავლეების დისკრიმინაციის წინააღმდეგ ბრძოლა“. ამის შესახებ იტყობინება Catholic News, pch24.pl-ზე დაყრდნობით.
„დოკუმენტს ამზადებს გერმანიის ეპისკოპოსთა კონფერენციის სკოლების სპეციალური კომისია. მისი მუშაობა სინოდალური გზის - გერმანიაში ეკლესიის რეფორმის პროცესის - გადაწყვეტილებების შედეგია, რომელიც 2019 წელს დაიწყო. სინოდალური გზის ფარგლებში შემოთავაზებული იყო ჰომოსექსუალობის, ბისექსუალობისა და ტრანსსექსუალობის სრული ნორმალიზაცია“, - ნათქვამია სტატიაში.
კათოლიკე რეფორმატორებმა ჩაატარეს გამოკითხვა მოსწავლეებში, მასწავლებლებსა და მშობლებში სკოლებში ჰომოსექსუალი, ბისექსუალი ან ტრანსგენდერი ადამიანების დისკრიმინაციის შესახებ და შემდეგ „გადაწყვიტეს მოქმედება“.
ტექსტს ამზადებს განათლების კომისიის თავმჯდომარე, ეპისკოპოსი ჰაინრიხ ტიმერევერსი. მისი დოკუმენტის მიზანია ისეთი სკოლის საფუძვლის შექმნა, რომელიც „ყველას მიიღებს“, რათა აღარ არსებობდეს ადგილი „სექსუალური იდენტობების მრავალფეროვნებასთან დაკავშირებით გაღიზიანების ან შფოთვისთვის“. ეპისკოპოსის მიერ მომზადებული დოკუმენტი სკოლებში „გენდერულად სამართლიანი ენის“ დანერგვას ურჩევს.
„დოკუმენტი ჯერ კიდევ დამუშავების პროცესშია. კრიტიკა გამოითქვა, მაგრამ სინოდალური გზის დოკუმენტები მკაფიო რეკომენდაციებს შეიცავს: გენდერული იდეოლოგია უნდა იქნას მიღებული“, - ასკვნის Catholic News.
როგორც მჟკ წერს, გერმანიაში საბავშვო ბაღებში გენდერული იდეოლოგიის დანერგვას მოითხოვენ.
