ჩეჩნეთში, კერძო ისლამური სკოლის მასწავლებელმა ბავშვები ჯოხებით სცემდა
ჩეჩნეთის საგამოძიებო კომიტეტი გუდერმესში, ისლამურ სკოლაში ბავშვების წამების ფაქტზე გამოძიებას აწარმოებს.
2025 წლის 14 ივლისს, ჩეჩნეთის საგამოძიებო კომიტეტმა გუდერმესში, ან-ნურის კერძო ისლამურ სკოლაში არასრულწლოვნების ცემის ფაქტზე გამოძიება დაიწყო. სკოლის მასწავლებელი, სადაც ბავშვები ყურანს სწავლობენ, მოსწავლეებს გაკვეთილების დროს ჯოხით სცემდა. ამის შესახებ იტყობინება Газета.Ru.
სოციალურ მედიაში გამოქვეყნებულ კადრებში ჩანს, თუ როგორ ურტყამს მასწავლებელი მინიმუმ ოთხ ბიჭს ფეხებსა და სხეულის სხვა ნაწილებში. ერთი მათგანი ეცემა, დანარჩენები კი იატაკზე წევს და ფიზიკური ვარჯიშების შესრულებას აიძულებენ. მოგვიანებით, ერთ-ერთი მსხვერპლის დედამ ბავშვის სხეულზე დალურჯებების ფოტოები გამოაქვეყნა. ბავშვთა უფლებების რეგიონულმა კომისარმა, ხამზატ ხირახმატოვმა, განაცხადა, რომ ინციდენტი თვენახევრის წინ მოხდა და მასწავლებელი სამსახურიდან გაათავისუფლეს.
მისი თქმით, „ზომები მიღებულია, სიტუაცია კონტროლს ექვემდებარება“. საგამოძიებო კომიტეტმა განმარტა:
„სოციალური ქსელების მონიტორინგის დროს აღმოჩენილ იქნა ვიდეო, რომელშიც გუდერმესის ქალაქის სკოლის მასწავლებელი ორ არასრულწლოვან მოსწავლეს ჯოხით ურტყამს“.
ამ ფაქტთან დაკავშირებით წინასწარი გამოძიება მიმდინარეობს რუსეთის ფედერაციის სისხლის სამართლის კოდექსის 117-ე მუხლით („წამება“), რომლის მაქსიმალური სასჯელი 7 წლამდე თავისუფლების აღკვეთაა.
ჩეჩნეთის ხელისუფლებასთან დაკავშირებულმა ოფიციალურმა არხებმა განაცხადეს, რომ საკითხი მოგვარებულია, თუმცა დეტალები არ მოუწოდებიათ. სოციალურ ქსელებში მომხმარებლებმა დაგმეს ინციდენტი და რელიგიურ სკოლებში ძალადობას „სისტემურ პრაქტიკად“ მოიხსენიეს, რომელზეც თვალის დახუჭვას ამჯობინებენ.
ადრე მჟკ-მა განაცხადა, რომ რუსეთი მსოფლიოში პირველი იყო, ვინც ოფიციალურად აღიარა ავღანეთის ისლამური საამირო.
