აშშ-ში ემბრიონების გენეტიკური „ოპტიმიზაციის“ სერვისი ამოქმედდა
მშობლებს, რომლებიც ინ ვიტრო განაყოფიერების მეთოდს იყენებენ, შესაძლებლობა ექნებათ აირჩიონ სასურველი სქესის, სიმაღლის, თვალის ფერის და თმის ფერის ემბრიონი. დანარჩენი განადგურდება.
ამერიკულმა კომპანია Nucleus Genomics-მა წარმოადგინა Nucleus Embryo პროგრამული უზრუნველყოფა, მსოფლიოში პირველი სისტემა ემბრიონების გენეტიკური „ოპტიმიზაციისთვის“, რომელიც მშობლებს საშუალებას აძლევს, ინ ვიტრო განაყოფიერების დროს გააანალიზონ 20-მდე ემბრიონის გენეტიკური პროფილი.
სისტემა მშობლებს საშუალებას აძლევს, გააანალიზონ და შეადარონ ემბრიონები 900-ზე მეტი მემკვიდრეობითი დაავადებისა და 40 დამატებითი პარამეტრის მიხედვით, მათ შორის კიბოს განვითარების რისკის, ქრონიკული დაავადებების, გარეგნობის, კოგნიტური შესაძლებლობების, ფსიქიკური ჯანმრთელობისა და სხვა მახასიათებლების მიხედვით.
გარდა ამისა, Nucleus მშობლებს სთავაზობს შესაძლებლობას, „ოპტიმიზაცია გაუკეთონ თავიანთ ემბრიონებს ინტელექტის მიხედვით“.
პლატფორმა უზრუნველყოფს 1000-ზე მეტი პარამეტრის ანალიზს: შეგიძლიათ აირჩიოთ სასურველი კოგნიტური შესაძლებლობების, სიმაღლის, თვალის ფერის, თმის ფერის და ა.შ. ემბრიონი. თანამშრომლები ასევე აცხადებენ, რომ მათ შეუძლიათ მომავალი ადამიანის სიცოცხლის ხანგრძლივობის პროგნოზირება.
სერვისის გაშვება შეერთებულ შტატებში ისტორიულად დაბალი შობადობისა და ინ ვიტრო განაყოფიერების მზარდი პოპულარობის ფონზე ხდება. შობადობის მაჩვენებელი შეერთებულ შტატებში ბოლო 15 წლის განმავლობაში 20%-ით შემცირდა და 2023 წელს 1970-იანი წლების შემდეგ ყველაზე დაბალ ნიშნულს მიაღწია. ამჟამად ყოველი 50-ე ბავშვი დამხმარე რეპროდუქციული ტექნოლოგიების დახმარებით იბადება. მანამდე, მჟკ-მა გაავრცელა ინფორმაცია, რომ გაყიდვაში გამოვიდა მსოფლიოში პირველი კომპიუტერი, რომელიც ადამიანის ნეირონებზეა დაფუძნებული.
