მიტროპოლიტმა თეოდორემ კახის წმ. გიორგის ტაძარში სადღესასწაულო ლიტურგია აღავლინა
საქართველოს საეკლესიო და სამთავრობო დელეგაცია ჰერეთის ქართველებს შეხვდა და ქურმუხის წმინდა გიორგის ტაძარი მოილოცა.
2025 წლის 23 ნოემბერს, გიორგობის დღესასწაულზე, სრულიად საქართველოს კათოლიკოს-პატრიარქის, უწმინდესი და უნეტარესი ილია II-ის კურთხევით, აზერბაიჯანის რესპუბლიკის ტერიტორიაზე, ისტორიულ ჰერეთში, კახის წმინდა გიორგის სახელობის ტაძარში სადღესასწაულო წირვა აღავლინა ხორნაბუჯისა და ჰერეთის ეპარქიის დროებითმა მმართველმა, ქორეპისკოპოსმა, ახალციხისა და ტაო-კლარჯეთის მიტროპოლიტმა თეოდორემ (ჭუაძე). მსახურებაში მონაწილეობდნენ ტაძრის წინამძღვარი დეკანოზი პეტრე ხუმარაშვილი და ეპარქიის სამღვდელოება.
საზეიმო ლიტურგიას დაესწრნენ ისტორიულ ჰერეთში მცხოვრებელი მრევლი, აგრეთვე საქართველოს საგანგებო და სრულუფლებიანი ელჩი აზერბაიჯანში ზურაბ პატარაძე, ქალაქ განჯაში საქართველოს გენერალური კონსული კახაბერ აბდალაძე და საელჩოს წარმომადგენლები.
მეუფე თეოდორემ ადგილობრივებს მისი უწმინდესობის ლოცვა-კურთხევა გადასცა, გიორგობის დღესასწაული მიულოცა და თბილი მიღებისთვის მადლობა გადაუხადა.
წირვის დასრულების შემდეგ მიტროპოლიტი თეოდორე მრევლთან ერთად ესტუმრა ქურმუხის წმინდა გიორგის ტაძარს, სადაც პარაკლისი გადაიხადა. დღეს ტაძარში განსაკუთრებული ხალხმრავლობა შეინიშნებოდა.
მსახურების დასრულების შემდეგ მეუფე თეოდორე ადგილობრივ მოსახლეობას გაესაუბრა. ჰერელებმა დიდი სიხარული გამოხატეს საქართველოს დელეგაციის ჩასვლის გამო.
ქართულ დელეგაციას კახის რაიონის აღმასრულებელი ხელისუფლების ახლად დანიშნული ხელმძღვანელი ელვინ ფაშაევი, მისი მოადგილე ელბრუს თაღიევი და რელიგიის სახელმწიფო კომიტეტის რეგიონული წარმომადგენლობის ხელმძღვანელი ილგარ ველიევი შეხვდნენ.
მიტროპოლიტმა თეოდორემ მადლობა გადაუხადა აზერბაიჯანის რესპუბლიკის რელიგიურ ორგანიზაციებთან მუშაობის სახელმწიფო კომიტეტს, საქართველოს რელიგიის საკითხთა სახელმწიფო სააგენტოს, კახის რაიონის ხელისუფლებას, აგრეთვე ორივე ქვეყნის საელჩოებს – ვიზიტის ორგანიზებაში შეტანილი წვლილისთვის.
მართლმადიდებელ ჟურნალისტთა კავშირი წერდა, სარკის მამათა მონასტერში დიაკვნად კურთხევისას უწმინდესი მსახურება შესრულდა.
