მასწავლებლის ეროვნული დღის აღსანიშნავად გივი მიქანაძემ პედაგოგები დააჯილდოვა

მასწავლებლის ეროვნული პრემიის გამარჯვებულებს 10 000-ლარიანი ფულადი ჯილდო და სამკერდე ნიშნები გადაეცათ.

2025 წლის 27 ოქტომბერს, მასწავლებლის ეროვნულ დღეს, საქართველოს განათლების, მეცნიერებისა და ახალგაზრდობის მინისტრმა გივი მიქანაძემ მასწავლებლის ეროვნული პრემიის გამარჯვებულები დააჯილდოვა.

ღონისძიებას მინისტრთან ერთად საქართველოს პრეზიდენტი მიხეილ ყაველაშვილი, პრემიერ-მინისტრი ირაკლი კობახიძე და პარლამენტის თავმჯდომარე შალვა პაპუაშვილი ესწრებოდნენ, რომლებმაც პედაგოგებს პროფესიული დღე მიულოცეს და მადლობა გადაუხადეს მათ განსაკუთრებული შრომისთვის.

გივი მიქანაძემ აღნიშნა, რომ ქვეყნის განვითარება პედაგოგთა თავდადებასა და ცოდნაზე დგას:

„მასწავლებლებს უდიდესი მისია გაკისრიათ და მას ღირსეულად ასრულებთ – ეს არის ყველაზე პატრიოტული და დიდი საქმე, რაც შეიძლება ადამიანმა ქვეყნისთვის აკეთოს. ქედს ვიხრი თითოეულის წინაშე და სრული პასუხისმგებლობით ვამბობ, რომ ჩვენთვის პრიორიტეტია თქვენი მხარდაჭერა და თქვენთან მჭიდრო თანამშრომლობა,“ – განაცხადა მინისტრმა.

მან ასევე ხაზი გაუსვა პირად გამოცდილებას მასწავლებლად მუშაობისას და აღნიშნა, რომ ეს პროფესია მის ცხოვრებაში უმნიშვნელოვანეს ადგილს იკავებს.

განათლების სისტემისა და საზოგადოების განვითარებაში შეტანილი განსაკუთრებული წვლილისთვის 2025 წლის მასწავლებლის ეროვნული პრემიის ლაურეატები გახდნენ:
ნანა ბურძენიძე – ჭიათურის მე-4 საჯარო სკოლა
თინათინ ფრუიძე – ბოლნისის პირველი საჯარო სკოლა
მაგდანა მათითაიშვილი – ბათუმის მე-16 საჯარო სკოლა
კლარა ფოცხვერაშვილი – ფოკის საჯარო სკოლა, ნინოწმინდის მუნიციპალიტეტი
ციალა ჭანტურია – წალენჯიხის მეორე საჯარო სკოლა
თამარ ჩხაიძე – თბილისის 37-ე საჯარო სკოლა
ელენე პატაშური – დუშეთის პირველი საჯარო სკოლა
ნელი გელაშვილი – თბილისის პირველი ექსპერიმენტული საჯარო სკოლა
შორენა ყარალაშვილი – მთისძირის საჯარო სკოლა, ყვარლის მუნიციპალიტეტი
თეიმურაზ დავითაძე – შუახევის საჯარო სკოლა

თითოეულ მათგანს გადაეცა მასწავლებლის ეროვნული პრემია, სამკერდე ნიშანი და ფულადი ჯილდო 10 000 ლარის ოდენობით.

მასწავლებლის ეროვნული დღე საქართველოში ყოველ წელს აღინიშნება იაკობ გოგებაშვილის დაბადების დღეს — 27 ოქტომბერს. ტრადიციულად, ამ დღეს პედაგოგების შრომა განსაკუთრებულად აღინიშნება, ხოლო მათი ღვაწლი — საჯაროდ ფასდება.

წლეულს, მინისტრ გივი მიქანაძის ინიციატივით, მასწავლებელთა შრომის აღიარების მიზნით, აქტივობები მთელი ქვეყნის მასშტაბით გაიმართა: თითოეულ მუნიციპალიტეტში შერჩეული და დაჯილდოვდა 5 ღვაწლმოსილი პედაგოგი, რომლებიც ასევე ესწრებოდნენ ეროვნული პრემიის გადაცემის ცერემონიას.

ღონისძიებას ესწრებოდნენ საქართველოს მართლმადიდებელი ეკლესიის პროტოპრესვიტერი, დეკანოზი გიორგი ზვიადაძე და სხვა სასულიერო პირები.

მასწავლებლის ეროვნული დღისა და პრემიის მიზანია, ხაზი გაუსვას პედაგოგის როლს ქვეყნის განვითარებაში, დააფასოს მათი შრომა და საზოგადოებაში გაზარდოს მასწავლებლის პროფესიის პრესტიჟი.

მართლმადიდებელ ჟურნალისტთა კავშირი წერდა, „გენერალ გიორგი მაზნიაშვილის სახელობის ახალგაზრდული ლეგიონის“ 22-ე საბაზისო კურსი დასრულდა.