18 ნოემბერს ეკლესია წმინდა მოწამეებს, გალაქტიონსა და ეპისტიმიას, იხსენებს
წმინდანები ქრისტეს სიყვარულისთვის უმძიმეს სატანჯველებს ითმენდნენ და სიცოცხლე მოწამეობრივად დაასრულეს.
18 ნოემბერს მართლმადიდებელი სამოციქულო ეკლესია წმინდა მოწამეებს — გალაქტიონსა და ეპისტიმიას — იხსენებს.
წმინდა გალაქტიონი ფინიკიის ქალაქ ემესაში, მდიდარი და დიდებული, თუმცა უშვილო მშობლების — კლიტოფონისა და ლევკიპიას — ოჯახში დაიბადა. მისი დედა, ლევკიპია, მღვდელმონაზონ ონოფრეს ქადაგების შედეგად ქრისტიანობაზე მოექცა. მალე მას ძილში ეუწყა, რომ ვაჟს შობდა, რომელიც ქრისტეს ჭეშმარიტი მიმდევარი გახდებოდა. წინასწარმეტყველება აღსრულდა — დაიბადა გალაქტიონი, რომელიც ქრისტიანული რწმენითა და ღვთისმოსაობით აღიზარდა.
გალაქტიონი განათლებული და გამორჩეული ახალგაზრდა იყო, თუმცა საერო დიდებისა და წარმატების ნაცვლად განმარტოებული, უბიწო ცხოვრება და ლოცვა აირჩია. როდესაც 24 წლის გახდა, მამამ მისი დაქორწინება გადაწყვიტა და საცოლედ დიდებული ქალწული ეპისტიმია შეურჩია. ღვთის განგებით, ქორწინება გადაიდო და გალაქტიონმა თავისი საცოლე ქრისტიანობაზე მოაქცია. ეპისტიმია და მისი მსახური ევტოლმიუსიც მოინათლნენ.
ქრისტეს რწმენით განმტკიცებულმა გალაქტიონმა და ეპისტიმიამ მონაზვნური ცხოვრება გადაწყვიტეს და ქალაქი დატოვეს. ისინი პუბლიონის მთაზე მდებარე მონასტრებში დამკვიდრდნენ, სადაც წლების განმავლობაში მარხვით, ლოცვითა და შრომით მოსაგრეობდნენ.
იმ პერიოდში ემესას რომაელი მმართველი სეკუნდუსი ქრისტიანთა სასტიკი მდევნელი იყო. როდესაც წარმართებმა მონასტრების არსებობის შესახებ შეიტყვეს, მათ დასაპყრობად მეომართა რაზმი გაგზავნეს. მონასტრის მკვიდრთა უმეტესობამ მთებში გახიზვნა მოასწრო, თუმცა გალაქტიონმა გაქცევაზე უარი თქვა და სენაკში დარჩა.
ეპისტიმიამ, როდესაც შეიტყო, რომ გალაქტიონი შეიპყრეს, იღუმენიას სთხოვა, მისთვისაც მიეცა უფლება, მოძღვართან და თანამოსაგრესთან ერთად ქრისტესთვის წამებულიყო. წინამძღვარმა ცრემლებით აკურთხა იგი მოწამეობრივი ღვაწლისთვის.
წმინდა გალაქტიონმა და ეპისტიმიამ ქრისტეს სიყვარულისა და რწმენის გამო უმძიმესი წამება დაითმინეს. წარმართმა მდევნელებმა ისინი ცოცხლად გაატყავეს და მოწამეობრივად აღასრულეს სიცოცხლე.
მათი ცხედრები ფარულად დაკრძალა ეპისტიმიას ყოფილმა მსახურმა, ევტოლმიუსმა, რომელიც ქრისტესმიერი ძმა და თანამოსაგრე გახდა. მანვე აღწერა წმინდა მოწამეთა ცხოვრება და წამება, რათა მათი ღვაწლი მომავალი თაობებისთვის შემონახულიყო.
წმინდა მოწამეების, გალაქტიონისა და ეპისტიმიას, ხსენების დღეს ეკლესია მათ ქრისტესადმი ურყევი ერთგულების, თავგანწირვისა და სულიერი სიმტკიცის მაგალითს იხსენებს.
მართლმადიდებელ ჟურნალისტთა კავშირი წერდა: 21 აგვისტოს მართლმადიდებელი ეკლესია წმინდა ექვთიმე გარეჯელს მოიხსენიებს.
