გიორგი გაბუნია: „ჩვენ არ დავუშვებთ, რომ ეკლესიისა და სახელმწიფოს დაპირისპირება მოხდეს“
კულტურის კომიტეტის თავმჯდომარე მეუფე იობის განცხადებებს გამოეხმაურა და აღნიშნა, რომ სახელმწიფოსა და ეკლესიას შორის დაპირისპირების მცდელობა ქვეყნის ეროვნულ ინტერესებს ეწინააღმდეგება.
კულტურის კომიტეტის თავმჯდომარე გიორგი გაბუნია მროველ-ურბნელ მიტროპოლიტ იობის მიერ ამბიონიდან გაკეთებულ პოლიტიკურ განცხადებებს გამოეხმაურა.
გაბუნიას განცხადებით, მისთვის გაუგებარია სასულიერო პირის მხრიდან ამბიონის პოლიტიკური განცხადებებისთვის გამოყენება. როგორც მან აღნიშნა, ეკლესიისა და სახელმწიფოს მისიები ერთმანეთისგან განსხვავდება, თუმცა მათ შორის კომუნიკაციისა და თანამშრომლობის ყველა შესაძლებლობა არსებობს.
„გულდასაწყვეტია, როდესაც მაღალი იერარქიის სასულიერო პირი იყენებს ამბიონს მცდარი, ტენდენციური და აბსოლუტურად გაუგებარი პოლიტიკური განცხადებებისთვის. ჩვენ გვიყვარს ჩვენი დედაეკლესია და ჩვენი ეკლესია არის განსაკუთრებული სიყვარულის საგანი“, – განაცხადა გიორგი გაბუნიამ.
მისივე თქმით, სახელმწიფოსა და ეკლესიას შორის დაპირისპირების გაღვივების მცდელობები ქვეყნის შიგნიდანაც და გარედანაც არსებობს, რაც საქართველოს ეროვნულ ინტერესებს არ ემსახურება.
გაბუნიამ აღნიშნა, რომ მზად არის, სასულიერო პირების მხრიდან დასმულ ყველა კითხვას ამომწურავი პასუხი გაეცეს, და ამ მიზნით მათთან კომუნიკაციის გაგრძელების მნიშვნელობას გაუსვა ხაზი.
„ჩვენ არ დავუშვებთ, რომ ეკლესიისა და სახელმწიფოს დაპირისპირება მოხდეს. ეს შედის პირდაპირ იმ გარე ძალების, მათ შორის შიდა ძალების, მავნე ძალების ინტერესებში, რომლებიც დღე და ღამე ცდილობენ, ძირი გამოუთხარონ ჩვენი ქვეყნის სახელმწიფოებრიობას“, – აღნიშნა მან.
გიორგი გაბუნიამ ასევე განაცხადა, რომ პატრიარქის მიმართ განსაკუთრებული სიყვარულისა და პატივისცემის გამო თავს შეიკავებს მის მიერ გაჟღერებულ პოლიტიკურ ბრალდებებზე უშუალო პასუხისგან.
მისი თქმით, მნიშვნელოვანია მეტი ურთიერთობა და კომუნიკაცია იმ სასულიერო პირებთანაც, რომლებსაც განსხვავებული პოზიცია აქვთ.
ინფორმაციას „ინტერპრესნიუსი“ ავრცელებს.
მართლმადიდებელ ჟურნალისტთა კავშირი წერდა, რომ მიტროპოლიტი იობი პარეხის მამათა მონასტერში საღმრთო ლიტურგიას აღავლენს.
