რენში მთავარანგელოზ გაბრიელის საკვირაო სკოლაში რეგისტრაცია გამოცხადდა
პროგრამით „რწმენა, სამშობლო, ადამიანი“ სწავლა უფასოა. სამრევლო დაინტერესებულ ოჯახებს 8 ნოემბერს, 16:00-დან 19:00 საათამდე ელის.
საფრანგეთში, ბრეტანის ქალაქ რენში, მთავარანგელოზ გაბრიელის სამრევლო ბავშვებსა და მოზარდებს საკვირაო სკოლაში იწვევს. შეხვედრები კვირაში ერთხელ, შაბათს ან კვირას გაიმართება. თვეში დაგეგმილია ოთხი შეხვედრა, რომელთა თემატიკა და სწავლების მეთოდები მონაწილეთა ასაკს მოერგება.
პროგრამის ფარგლებში მოსწავლეები პედაგოგთან და სასულიერო პირთან ერთად გაეცნობიან მართლმადიდებლური სარწმუნოების საფუძვლებს, საეკლესიო დღესასწაულების ისტორიას, ქრისტიანულ წეს-ჩვეულებებსა და წმინდა მამათა ცხოვრებას. მეტყველების კულტურის გაკვეთილებზე ბავშვები წაიკითხავენ ზღაპრებს, იგავებსა და მხატვრულ ნაწარმოებებს, ნახავენ ასაკის შესაბამის ფილმებს და მათში წამოჭრილ საკითხებზე იმსჯელებენ. უფროსი ასაკის მოსწავლეები მართლმადიდებლურ და აღმზრდელობით ტექსტებსაც განიხილავენ.
ხელოვნებისა და ხელსაქმის გაკვეთილებს მხატვრები და ხელოვნების სხვა დარგების წარმომადგენლები გაუძღვებიან. მოსწავლეებს ასევე შეეძლებათ ფრანგული და ინგლისური ენების შესწავლა A1 და A2 დონეებზე, წერითი და სასაუბრო სავარჯიშოებით. სპორტულ შეხვედრებსა და მეგობრულ ტურნირებს პროფესიონალი ინსტრუქტორი უხელმძღვანელებს.
საკვირაო სკოლაში დაგეგმილია მოლოცვითი ექსკურსიები, თეატრალური სახელოსნოები და ქართული ხალხური შემოქმედებისა და ტრადიციებისადმი მიძღვნილი შეხვედრები. თვეში ერთხელ მოსწავლეთა მშობლებიც შეიკრიბებიან და მოძღვართან ერთად ქრისტიანულ ღირებულებებზე, ბავშვის აღზრდასა და ასაკობრივ თავისებურებებზე ისაუბრებენ.
შეხვედრა გაიმართება კვირას, 8 ნოემბერს, 16:00-დან 19:00 საათამდე.
მისამართი — 16 rue Sergent Guihard, 35000 Rennes
რეგისტრაციისა და დამატებითი ინფორმაციისთვის — 07 53 62 09 82
მართლმადიდებელ ჟურნალისტთა კავშირმა დაწერა, რომ რენში ფერისცვალების დღესასწაულზე ტაძარი მომლოცველებისთვის ღია იქნება.
