ბოლნისის მუზეუმში შეხვედრა გაიმართა
ღონისძიების ფარგლებში პროფესორებმა გიორგი ჭეიშვილმა და ვალერი ვაშაკიძემ საქართველოს გაქრისტიანებისა და ქართველთა ეთნოგენეზის საკითხებზე მოხსენებები წაიკითხეს.
ქრისტიანობის სახელმწიფო რელიგიად გამოცხადების 1700 წლისთავთან დაკავშირებით, ბოლნისის მუზეუმში შეხვედრა გაიმართა.
ღონისძიებაზე პროფესორებმა გიორგი ჭეიშვილმა და ვალერი ვაშაკიძემ მოხსენებები წაიკითხეს. გიორგი ჭეიშვილის მოხსენების თემა იყო „წმინდა ნინო და ქრისტიანობის სახელმწიფო რელიგიად გამოცხადება“, ხოლო ვალერი ვაშაკიძემ ქართველთა ეთნოგენეზის შესახებ ისაუბრა.
შეხვედრას ბოლნელი მთავარეპისკოპოსი ეფრემი, ეპარქიის სასულიერო პირები, ბოლნისის მუნიციპალიტეტის მერის პირველი მოადგილე ალექსანდრე ზაბახიძე, მუნიციპალიტეტის საკრებულოს თავმჯდომარე გიორგი სვანიძე, მერის მოადგილეები — ვალენტინა ნავერიანი და თურალ ვალიევი, ადგილობრივი თვითმმართველობის წარმომადგენლები, საქართველოს საპატრიარქოს წმინდა იოანე ბოლნელის სახელობის სკოლის პედაგოგები და მოსწავლეები, ასევე საზოგადოების წევრები ესწრებოდნენ.
შეხვედრის მთავარი მიზანი საქართველოს ისტორიაში ქრისტიანობის სახელმწიფო რელიგიად გამოცხადების მნიშვნელობის გააზრება და ამ ისტორიულ მოვლენასთან დაკავშირებული საკითხების საზოგადოებისთვის გაცნობა იყო.
მართლმადიდებელ ჟურნალისტთა კავშირი წერდა, საქართველოში ქრისტიანობის სახელმწიფო რელიგიად გამოცხადების 1700 წლისთავთან დაკავშირებით მომლოცველობითი მსვლელობა დაიწყო.
