8 სექტემბერს მართლმადიდებელი ეკლესია მოიხსენებს წმინდა მოწამეთა ადრიანესა და ნატალიას
მართლმადიდებელი ეკლესია IV საუკუნეში ქრისტესთვის მოწამებრივად აღსრულებულ მეუღლეებს მოიხსენიებს.
წმინდა ადრიანე და ნატალია ნიკომედიაში ცხოვრობდნენ იმპერატორ დიოკლეტიანესა და მისი თანამმართველის, მაქსიმიანე გალერუსის, დროს, როდესაც ქრისტიანთა სასტიკი დევნა მიმდინარეობდა.
გადმოცემის თანახმად, ადრიანე წარმართი იყო და მაღალი თანამდებობა ეკავა. ერთხელ მან იხილა, როგორ იტანჯებოდნენ ქრისტიანები სარწმუნოების გამო. მოწამეთა სიმტკიცემ და ღვთისადმი სიყვარულმა მასზე იმდენად დიდი გავლენა მოახდინა, რომ თავადაც ირწმუნა ქრისტე და სასამართლოს მწერლებს სთხოვა, მისი სახელიც ქრისტიანთა გვერდით ჩაეწერათ.
ადრიანეს მეუღლე, ნატალია, ფარულად ქრისტიანი იყო. როდესაც შეიტყო, რომ მისმა ქმარმა ქრისტე აღიარა, მწუხარება სიხარულით შეეცვალა და საპყრობილეში მივიდა. წმინდა ნატალია მეუღლეს ამხნევებდა, სიმტკიცისკენ მოუწოდებდა და ქრისტეს სარწმუნოების ერთგულებისკენ მოუწოდებდა.
ნატალია დიდ თავდადებას იჩენდა საპყრობილეში მყოფი მოწამეების მიმართაც. იგი მათ წყლულებს ბანდავდა, უვლიდა და შვიდი დღის განმავლობაში მათ მსახურებაში იმყოფებოდა.
მალე ადრიანესა და სხვა ქრისტიანთა სასტიკი წამება დაიწყო. მიუხედავად უმძიმესი სატანჯველისა, წმინდა ადრიანე მტკიცედ აღიარებდა ქრისტეს და უარს ამბობდა წარმართული ღმერთებისთვის მსხვერპლის შეწირვაზე. ნატალია კი ბოლომდე გვერდით ედგა მეუღლეს და სულიერად ამხნევებდა მას.
წმინდა ადრიანე სასტიკი წამების შემდეგ აღესრულა. ნატალიამ მისი წმინდა ხელი შეინახა და მოგვიანებით ბიზანტიაში გადაასვენა. იქ, წმინდა მოწამეთა ნაწილებთან ერთად, ადრიანეს წმინდა ნაწილიც განისვენებდა. თავად ნატალიაც მალევე აღესრულა და მოწამეებთან ერთად დაიკრძალა.
წმინდა ადრიანესა და ნატალიას ცხოვრება ქრისტიანული ერთგულების, სულიერი სიმტკიცისა და მეუღლეთა ურთიერთსიყვარულის მაგალითად იქცა.
ცნობისათვის, თბილისში, წმინდა ალექსანდრე ნეველის სახელობის ტაძარში, სხვა სიწმინდეებთან ერთად, დაბრძანებულია წმინდა ადრიანეს წმინდა ნაწილიც.
მართლმადიდებელ ჟურნალისტთა კავშირი წერდა, 7 სექტემბერს ეკლესია წმინდა მოციქულ ბართლომეს წმინდა ნაწილთა აღმოყვანებას ისენებს.
