7 სექტემბერს ეკლესია წმინდა მოციქულ ბართლომეს წმინდა ნაწილთა აღმოყვანებას ისენებს
წმინდა მოციქულის ნაწილებმა სასწაულებრივად გადაკვეთეს ზღვა და იტალიის კუნძულ ლიპარაზე მიაღწიეს.
მართლმადიდებელი სამოციქულო ეკლესია 7 სექტემბერს იხსენიებს წმინდა მოციქულის, ბართლომეს, წმინდა ნაწილთა აღმოყვანებას.
წმინდა მოციქული ბართლომე ქალაქ ალბანში, დღევანდელი ბაქოს ტერიტორიაზე, ქრისტესთვის 71 წელს ეწამა და იქვე დაკრძალეს. მისი წმინდა ნაწილებიდან მრავალი სასწაული აღესრულებოდა და არაერთი ადამიანი ჭეშმარიტ სარწმუნოებაზე მოექცა.
იმპერატორ ანასტასის (491-518) დროს წმინდა ბართლომეს ნეშტი ქალაქ ანასტასიოპოლში გადაასვენეს. მოგვიანებით, როდესაც ქალაქი სპარსეთის მეფე ხოსრომ დაიპყრო, ქრისტიანებმა წმინდა ნაწილების შავი ზღვის სანაპიროსკენ გადაბრძანება გადაწყვიტეს.
მათ დევნილი ქრისტიანების მდგომარეობის გამო წმინდა ნაწილები ლუსკუმით ზღვას მიანდეს. ბართლომეს ნეშტთან ერთად ზღვაში კიდევ ოთხი კიდობანი ჩაუშვეს, რომლებშიც წმინდა მოწამეთა — პაპიანეს, ლუკიანეს, გრიგოლისა და აკაკის — ნაწილები იყო.
ღვთის განგებით, კიდობნები არ ჩაიძირა. ისინი სასწაულებრივად გაცურდნენ და იტალიის სანაპიროებს მიაღწიეს. წმინდა მოციქულ ბართლომეს უხრწნელი ნაწილები კუნძულ ლიპარის ნაპირებს მიადგა, ხოლო სხვა კიდობნებმა გზა განაგრძეს და იტალიის სხვადასხვა ადგილას გაჩერდნენ.
წმინდა ნაწილების მობრძანება სასწაულებრივი ჩვენებით ადგილობრივ ეპისკოპოს აღათონს ეუწყა. იგი სასულიერო პირებთან ერთად ზღვის ნაპირზე გავიდა, ლუსკუმა წყლიდან გამოასვენა და წმინდა ნაწილები დიდი პატივით ტაძარში გადააბრძანა.
გადმოცემის თანახმად, წმინდა ბართლომეს უხრწნელი ნაწილებიდან მაკურნებელი მირონი გადმოდიოდა.
წმინდა სიწმინდე კუნძულ ლიპარის ეკლესიაში IX საუკუნის შუა წლებამდე დარჩა. მას შემდეგ, რაც კუნძული წარმართებმა დაიპყრეს, ქრისტიანმა ვაჭრებმა წმინდა ნაწილები ქალაქ ბენევენტუმში გადაასვენეს, სადაც მათ დიდი პატივით შეეგებნენ და ქალაქის მთავარ ტაძარში მიუჩინეს ადგილი.
ზოგიერთი ცნობით, ბართლომე მოციქულის წმინდა ნეშტი, ან მისი წმინდა ნაწილების ნაწილი, X საუკუნეში რომში იქნა გადაბრძანებული.
მართლმადიდებელ ჟურნალისტთა კავშირი წერდა, ათონის მთაზე, ყუთლუმუსში, გაიმართა „ღირს არს“ ხატით მსვლელობა.
