29 ივნისს მართლმადიდებელი ეკლესია წმიდა მოწამე ქაიხოსრო ქართველს მოიხსენებს
წმინდანი შაჰ-აბასის ბრძანებით წმიდა ხატების დაცვისთვის ეწამა.
29 ივნისს მართლმადიდებელი სამოციქულო ეკლესია მოიხსენიებს წმიდა მოწამე ქაიხოსრო ქართველს, რომელმაც, საეკლესიო გადმოცემის თანახმად, ქრისტიანული სარწმუნოებისა და წმიდა ხატების ერთგულებისთვის მოწამებრივი აღსასრული მიიღო.
წმიდა ქაიხოსრო ქართველის შესახებ ცნობები დაცულია XVIII საუკუნის ცნობილი საეკლესიო მოღვაწისა და მწერლის, ტიმოთე გაბაშვილის ნაშრომში „მიმოსვლა“. ავტორი აღწერს იერუსალიმის სიწმინდეებს, ჯვრის ქართველთა მონასტერს, მის აღაპებსა და ფრესკებს.
ტიმოთე გაბაშვილი აღნიშნავს, რომ ჯვრის მონასტრის კედლებზე გამოსახულნი იყვნენ საქართველოს წმიდა მამები და მოწამეები, რომელთაც შარავანდედი და მოწამებრივი გვირგვინი ამშვენებდათ. მათ შორის იხსენიება წმიდა მოწამე ქაიხოსრო ქართველიც.
როგორც „მიმოსვლაში“ ვკითხულობთ:
„...და კვალად იერუსალიმით მივედით მონასტრად ქართველთასა ჯვარს და განვიცადეთ, კედელთა ზედა წმიდანი მამანი და მოწამენი საქართველოსანი ეხატნეს შარავანდითა და გვირგვინითა... წმიდა მოწამე ქაიხოსრო ქართველი, რომელიც აწამა ყეენმან შაჰ-აბაზ წმიდათა ხატთათვის...“
საეკლესიო გადმოცემის მიხედვით, წმიდა ქაიხოსრო ქართველი სპარსეთის შაჰის, აბას I-ის (შაჰ-აბასის) ბრძანებით ეწამა, რადგან უარი თქვა წმიდა ხატების შეურაცხყოფასა და ქრისტიანული სარწმუნოების უარყოფაზე.
წმიდა მოწამე ქაიხოსრო ქართველი საქართველოს ეკლესიის მიერ მოწამედ არის შერაცხილი და მისი ხსენება ყოველწლიურად 29 ივნისს აღინიშნება. მისი ცხოვრება ქრისტიანული სიმტკიცის, სარწმუნოებისადმი ერთგულებისა და წმიდა სიწმინდეების დაცვის მაგალითს წარმოადგენს.
ადრე მართლმადეიდებელ ჟურნალისტთა კავშირი წერდა, რომ მართლმადიდებელი ეკლესია 22 ივნისს წმიდა კირილე ალექსანდრიელის ხსენებას აღნიშნავს.
