საპატრიარქოში საერთაშორისო დელეგაციასთან შეხვედრა გაიმართა
უცხოელი მართლმადიდებელი იერარქები საქართველოს ახლადაღსაყდრებულ კათოლიკოს-პატრიარქ შიო III-ს შეხვდნენ და გულითადად მიულოცეს პატრიარქის ტახტზე ასვლა.
2026 წლის 18 მაისს საქართველოს საპატრიარქო რეზიდენციაში სხვადასხვა ქვეყნის მართლმადიდებელი ეკლესიების მაღალი რანგის წარმომადგენლები იმყოფებოდნენ. დელეგაცია მიიღო სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიო III-მ.
საპატრიარქოში საგანგებოდ მისი უწმინდესობის აღსაყდრებასთან დაკავშირებით ჩამოსული სტუმრები იმყოფებოდნენ. შეხვედრების ფარგლებში სრულიად საქართველოს კათოლიკოს-პატრიარქი თავდაპირველად შეხვდა ჩეხეთისა და სლოვაკეთის მიტროპოლიტს, უნეტარეს როსტისლავს.
საპატრიარქოში ასევე იმყოფებოდნენ ალექსანდრიის, ანტიოქიის, პოლონეთის, უკრაინის, სერბეთის, ბულგარეთის, საბერძნეთისა და ალბანეთის მართლმადიდებელი ეკლესიების მაღალი რანგის სასულიერო პირები. შეხვედრას ესწრებოდნენ საქართველოს წმინდა სინოდის წევრები და სხვა სასულიერო პირებიც.
შეხვედრაზე გაიხსენეს საქართველოს კათოლიკოს-პატრიარქ ილია II-ის დაკრძალვის დღე და სხვადასხვა მართლმადიდებელი ეკლესიის წარმომადგენლების ვიზიტები საქართველოში.
საქართველოს ეკლესიის მეთაურმა დელეგაციის წევრებს მადლობა გადაუხადა მხარდაჭერისა და მძიმე პერიოდში სოლიდარობისთვის.
უცხოელმა იერარქებმა უწმინდესსა და უნეტარეს შიო III-ს კიდევ ერთხელ მიულოცეს საპატრიარქო ტახტზე აღსაყდრება და უსურვეს მრავალჟამიერი სიცოცხლე ერისა და ეკლესიის საკეთილდღეოდ.
შეგახსენებთ, რომ 2026 წლის 11 მაისს საქართველოს მართლმადიდებელი ეკლესიის წმინდა სინოდმა საქართველოს 142-ე კათოლიკოს-პატრიარქად შიო III აირჩია, ხოლო მისი ინტრონიზაცია 12 მაისს სვეტიცხოვლის საკათედრო ტაძარში გაიმართა.
მართლმადიდებელ ჟურნალისტთა კავშირი წერდა, საქართველოს პატრიარქის, შიო მესამეს სიტყვა ოჯახის სიწმინდის დღეს.
