კონსტანტინოპოლის იერარქი: რუსეთის მართლმადიდებლურმა ეკლესიამ ომი გამოგვიცხადა
ქალკედონის მიტროპოლიტმა ემანუელმა რუსეთის ეკლესიას „პროპაგანდის მექანიზმი“ უწოდა.
ქალკედონის მიტროპოლიტმა ემანუელმა ბერძნულ გაზეთ „კაფიმერინისთან“ ინტერვიუში განაცხადა, რომ რუსეთის მართლმადიდებლურმა ეკლესიამ კონსტანტინოპოლის საპატრიარქოს „ტოტალური ომი“ გამოუცხადა. ამის შესახებ Orthodox Time იტყობინება.
„ჩვენ უცნობ წყლებში შევდივართ არა იმდენად მნიშვნელოვანი ცვლილებების გამო, არამედ იმიტომ, რომ ბარბაროსობა ზოგადად ნორმად იქცევა ეკლესიათაშორის ურთიერთობებში. როგორც ჩანს, ჩვენ ინსტიტუციონალიზებული ბარბაროსობის რეალიზაციის წინაშე ვდგავართ და იმის, თუ რას ნიშნავს სინამდვილეში მოსკოვის საპატრიარქოს მიერ გამოცხადებული ტოტალური ომი, მიუხედავად ჩვენი მცდელობებისა, შევინარჩუნოთ იმედი“, - განაცხადა იერარქმა.
მან არ დააკონკრეტა რუსეთის მართლმადიდებლური ეკლესიის მხრიდან „ომის“ ხასიათი, მაგრამ დაარწმუნა, რომ „ფანარიონი მას ლოცვითი დუმილით პასუხობს“.
მისი თქმით, კონსტანტინოპოლის საპატრიარქო ბალტიისპირეთის ქვეყნებში თავის სტრუქტურებს აფუძნებს, „რათა მოსკოვის საპატრიარქოს კანონიკური არეულობა განიკურნოს, ხალხის საზრუნავი გაიზიაროს, როგორც ამას საუკუნეების განმავლობაში აკეთებდა“.
„არ უნდა დაგვავიწყდეს, რომ როგორც ესტონეთის, ასევე ლატვიის ეკლესიები ადრე მსოფლიო საპატრიარქომ ავტონომიურად გამოაცხადა და დღეს ლიეტუვაში მსოფლიო საპატრიარქოს ეგზარქოსის შექმნა უდიდესი მნიშვნელობის მოვლენაა, რომელიც შეშინებულ მართლმადიდებლებს იმედს აძლევს. ეს ნაბიჯი, ისევე როგორც ესტონეთში გაწეული მხარდაჭერა, „შეჭრას“ ნაცვლად, როგორც მას შეცდომით უწოდებენ, სინამდვილეში 1945 წელს ძალის გამოყენებით მიყენებული ჭრილობის აუცილებელ მოშუშებას წარმოადგენს“, - განაცხადა მიტროპოლიტმა.
მან ასევე ხაზგასმით აღნიშნა, რომ „მსოფლიო საპატრიარქო არასდროს შეცვლის თავის პოზიციას უკრაინასთან და ავტოკეფალიის კანონიკურ მინიჭებასთან დაკავშირებით, რადგან ეს საკითხი საეკლესიო არხებით გადაწყდა და შეუქცევადია“.
ადრე, მართლმადიდებელ ჟურნალისტთა კავშირმა დაწერა, რომ მიტროპოლიტ ემანუელის თქმით, კონსტანტინოპოლის საპატრიარქო არ უჭერს მხარს მონტენეგროს სქიზმატებს.
