30 დეკემბერს მართლმადიდებელი ეკლესია წინასწარმეტყველ დანიელსა და სამ ყრმას იხსენებს
წმიდა დანიელისა და ანანია, აზარიასა და მისაელის ურყევი სარწმუნოება და წინასწარმეტყველება ქრისტეს შობის შესახებ.
30 დეკემბერს მართლმადიდებელი სამოციქულო ეკლესია იხსენებს წმიდა წინასწარმეტყველ დანიელს და სამ ყრმას — ანანიას, აზარიას და მისაელს, რომლებიც ქრისტეს შობამდე VI საუკუნეში ბაბილონის ტყვეობაში აღესრულნენ ღვთის ნების მსახურებით.
ქრისტეს შობამდე დაახლოებით 600 წელს ბაბილონის მეფემ, ნაბუქოდონოსორმა, იერუსალიმი დაიპყრო, დაარღვია სოლომონის ტაძარი და მრავალი იუდეველი ტყვედ წაასხა. დატყვევებულთა შორის იყვნენ კეთილშობილი და გონიერი ჭაბუკები — დანიელი, ანანია, აზარია და მისაელი, რომლებიც მეფის კარზე აღზრდისთვის გამოარჩიეს. მიუხედავად ფუფუნებისა და წარმართული გარემოსი, ისინი ერთგულად ემსახურებოდნენ ჭეშმარიტ ღმერთს, მარხვასა და ლოცვაში ცხოვრობდნენ და მოსეს სჯულს არ განეშორნენ.
ღვთის მადლით წმიდა დანიელს განსაკუთრებული სიბრძნე მიენიჭა — მან განმარტა მეფე ნაბუქოდონოსორის დავიწყებული სიზმარი და მისი წინასწარმეტყველური მნიშვნელობა, რის შემდეგაც მეფემ იგი ბაბილონის მმართველად დანიშნა. მოგვიანებით, ოქროს კერპის თაყვანისცემაზე უარის თქმისთვის სამი ყრმა გახურებულ ღუმელში ჩააგდეს, თუმცა ღვთის ანგელოზმა ცეცხლი განაგრილა და წმიდანები უვნებლად გადაარჩინა. ამ სასწაულის შემხედვარე მეფემ თავადაც აღიარა ჭეშმარიტი ღმერთი.
წმიდა დანიელმა ასევე განმარტა ბაბილონის მეფე ბალთაზარის დროს კედელზე გამოჩენილი იდუმალი წარწერა — „მანე, თეკელ, ფარეს“, რომელმაც ბაბილონის სამეფოს დაცემა იწინასწარმეტყველა. სპარსეთის მეფე დარიოსის ზეობისას კი დანიელი ლომების ბუნაგში ჩააგდეს, თუმცა უფლის ძალით უვნებლად გადარჩა, რის შემდეგაც დარიოსმა მთელ სამეფოში ჭეშმარიტი ღმერთის დიდება ბრძანა.
ნეტარმა დანიელმა ზუსტად იწინასწარმეტყველა ქრისტეს განკაცების ჟამიც — 490 წელი იერუსალიმის აღდგენის ბრძანებიდან. იგი შუამდგომლობდა იუდეველთა გათავისუფლებისათვის მეფე კიროსის წინაშე. წმიდა წინასწარმეტყველი ტყვეობაში აღესრულა, ხოლო მისი წმიდა ნაწილები მოგვიანებით წმიდა ელენე დედოფალმა კონსტანტინოპოლში გადაასვენა.
გადმოცემის თანახმად, ანანია, აზარია და მისაელი მოწამებრივად აღესრულნენ. მათი უხრწნელი ნაწილები ბაბილონში გამოვლინდა და მოგვიანებით ქრისტიანთა მიერ სამარტვილეში იქნა პატივით გადაბრძანებული.
მართლმადიდებელი ეკლესია ამ დღეს განსაკუთრებული პატივით იხსენებს წმიდა დანიელისა და სამი ყრმის ურყევ სარწმუნოებას, სიმტკიცესა და ღვთისადმი ერთგულებას.
მართლმადიდებელ ჟურნალისტთა კავშირი წერდა, მართლმადიდებელი ეკლესია 23 დეკემბერს წმიდა მეფე ვახტანგ მესამის ხსენებას აღნიშნავს.
