მართლმადიდებელი ეკლესია 28 ოქტომბერს აღნიშნავს ღირსმოწამე ლუკიანე ანტიოქიელის ხსენებას
ღირსი ლუკიანე, წმინდა წერილის განმწმენდელი, მღვდელმოწამე და ქრისტესადმი ურყევი აღმსარებელი.
28 ოქტომბერს მართლმადიდებელი ეკლესია იხსენიებს ღირსმოწამე ლუკიანე ანტიოქიელს — წმინდანს, რომელმაც თავისი ცხოვრება მთლიანად მიუძღვნა ღვთის სიტყვის ქადაგებასა და მართლმადიდებელი სარწმუნოების დაცვას.
ღირსმოწამე ლუკიანე სირიის ქალაქ სამოსატში დაიბადა. იგი მცირე ასაკში დაობლდა, რის შემდეგაც მთელ ქონება გლახაკებს დაურიგა და ქალაქ ედესაში წავიდა, სადაც მაკარი აღმსარებლის ხელმძღვანელობით სწავლობდა წმინდა წერილსა და სათნო ცხოვრებას. მისი სწავლულობისა და სარწმუნოებრივი ერთგულების გამო ლუკიანე ხუცესად დაადგინეს.
ანტიოქიაში მან გახსნა ცნობილი სკოლა, სადაც მრავალი მოწაფე აღზარდა. განსაკუთრებული ღვაწლი მიუძღვის წმინდა წერილის გადამწერებისა და ერეტიკოსების მიერ დამახინჯებული ტექსტების შესწორების საქმეში — სწორედ ლუკიანეს სახელთან არის დაკავშირებული ბიბლიის სანდო ბერძნული ტექსტის დადგენა, რომელიც შემდგომ კონსტანტინე დიდის ზეობისას იქნა აღმოჩენილი.
დიოკლეტიანეს დევნის პერიოდში (284–305) წმინდანი შეიპყრეს და ნიკომიდიის საპყრობილეში გამოკეტეს, სადაც ცხრა წლის განმავლობაში იტანჯებოდა შიმშილითა და ტანჯვით. სიკვდილის წინ, ღვთის განცხადების დღესასწაულზე, ჯაჭვებით სარეცელზე მიჯაჭვულმა ლუკიანემ თავად აღასრულა საღვთო ლიტურგია, ეზიარა და აზიარა იქ მყოფი ქრისტიანები.
ღირსმოწამე ლუკიანე სწორედ საპყრობილეში აღესრულა და მისი ცხედარი ზღვაში მოისროლეს, თუმცა ოცდაათი დღის შემდეგ დელფინებმა წმინდა ნეშტი ნაპირზე გამოიტანეს. მორწმუნეებმა დიდი პატივით მიაბარეს მიწას უფლის რჩეულის სხეული.
თავდაპირველად წმინდანის ხსენება 7 იანვარს აღინიშნებოდა, მაგრამ შემდგომ იოანე ნათლისმცემლის კრებასთან დამთხვევის გამო მისი ხსენება 28 ოქტომბერზე იქნა გადატანილი.
მართლმადიდებელ ჟურნალისტთა კავშირი წერდა, მართლმადიდებელი ეკლესია 27 ოქტომბერს იხსენიებს წმინდა მოწამეთ ნაზარის, გერვასის, პროტასისა და კელსის.
