11 ოქტომბერს მართლმადიდებელი ეკლესია ღირსი ხარიტონ აღმსარებლის ხსენებას აღნიშნავს
სარწმუნოების მტკიცე აღმსარებელი და ფარანის ლავრის დამაარსებელი, რომლის სიმტკიცემ, თავმდაბლობამ და რწმენამ საუკუნო მადლი დაუტოვა ქრისტიანულ სამყაროს.
ღირსი ხარიტონ აღმსარებელი IV საუკუნის ერთ-ერთი უდიდესი სულიერი მოღვაწეა, რომელიც წარმოშობით იკონიადან იყო. იგი ქრისტეს სარწმუნოებისადმი ურყევი ერთგულებისთვის სასტიკად იწამა 270–324 წლების დევნისას. უღმრთოებმა მას ცრუღმერთებისადმი მსხვერპლის შეწირვა მოსთხოვეს, თუმცა წმინდანმა მტკიცე უარი განაცხადა. ამ უარის გამო ჯალათებმა სასტიკად აწამეს, სცემეს ძროხის ძარღვებით, ცეცხლით დაუწვეს მკერდი და ბორკილებით დააბეს.
დევნის შეწყვეტის შემდეგ ხარიტონი გათავისუფლდა და იერუსალიმისკენ გაემართა. გზად ავაზაკებმა შეიპყრეს და გამოქვაბულში გამოკეტეს, თუმცა ღვთის განგებით სასწაულებრივად გადარჩა, ავაზაკები შხამით მოწამლული ღვინით დაიღუპნენ. მადლიერებით აღვსილმა წმინდანმა სწორედ ამ მღვიმეში დაიწყო განმარტოებული ცხოვრების გზა, სადაც შემდგომში დააარსა პირველი სავანე, ფარანის ლავრა.
ღირსი ხარიტონის ხელმძღვანელობით შეიქმნა მონაზვნური ცხოვრების მკაფიო წეს-განგება, რომელიც მოგვიანებით მთელ პალესტინურ მონასტრულ ცხოვრებაზე გავრცელდა. წმინდანის სახელთან არის დაკავშირებული სამი ცნობილი სავანის: ფარანის, იერიქონის და სუკიის („ძველი ლავრა“) — დაარსება.
ღმერთმა თავის რჩეულს სნეულთა კურნებისა და წინასწარჭვრეტის ნიჭი მიმადლა. სიკვდილის მოახლოების წინ მან მოწაფეები შეაგონა, მშვიდად აღესრულა და დაკრძალეს იმავე ტაძარში, რომელიც თავად ავაზაკთა მღვიმის ადგილზე ააგო.
ღირსი ხარიტონი მიიცვალა დაახლოებით 350 წელს, ღრმა მოხუცებულობაში. მისი ხსენება მართლმადიდებელი ეკლესიის მიერ ყოველწლიურად აღინიშნება 11 ოქტომბერს.
ღირსი ხარიტონი ერთ-ერთ პირველ ორგანიზებულ მონასტრულ ცხოვრებას წარმოადგენს პალესტინის უდაბნოებში. მისმა ღვაწლმა უდიდესი როლი ითამაშა აღმოსავლური მონაზვნობის ჩამოყალიბებაში. წმინდანის მიერ ჩამოყალიბებული ლავრული წესები საფუძვლად დაედო შემდგომ ბერძნულ და ქართულ მონასტრულ ტრადიციებსაც.
მისი ცხოვრება გვახსენებს რწმენის ურყევ ძალას, თავმდაბლობასა და მადლიერებას, რომლებმაც იგი საუკუნეების განმავლობაში სასწაულის და სულიერი სიმტკიცის სიმბოლოდ აქცია.
მართლმადიდებელ ჟურნალისტთა კავშირი წერდა, 11 ოქტომბერს აღინიშნება კრება ღირს კიევო-პეჩორელ მამათა, ახლო (ღირსი ანტონის) მღვიმეებში განსვენებულთა.
