ამერიკისა და მაკედონიის ეკლესიების წინამძღვრების ლიტურგია ამერიკის შეერთებულ შტატებში გაიმართება
ვაშინგტონში წირვა მაკედონიის ეკლესიის ავტოკეფალიის ოფიციალურ აღიარებას აღნიშნავს ამე-ს მიერ.
2025 წლის 2 სექტემბერს, ვაშინგტონში, წმინდა ნიკოლოზის ტაძარში, ისტორიული ერთობლივი საღვთო ლიტურგია გაიმართება, რომელსაც ამერიკის მართლმადიდებელი ეკლესიის (ამე) წინამძღვარი, მიტროპოლიტი ტიხონი და მაკედონიის მართლმადიდებელი ეკლესიის - ოჰრიდის არქიეპარქიის მეთაური, მთავარეპისკოპოსი სტეფანი უხელმძღვანელებენ. ეს წირვა ამე-ს მიერ მაკედონიის ეკლესიის ავტოკეფალიის ოფიციალურ აღიარებას წარმოადგენს და ორ ადგილობრივ ეკლესიას შორის სრულ ევქარისტიულ ზიარებას დაამყარებს.
როგორც ამე-ს პრესსამსახური იტყობინება, ეს იქნება პირველი შემთხვევა, როდესაც ამერიკული ეკლესია საჯაროდ აღიარებს მაკედონიის ეკლესიას, როგორც დამოუკიდებელ ავტოკეფალურ მართლმადიდებლურ სტრუქტურას.
ლიტურგია ადგილობრივი დროით დილის 9:00 საათზე დაიწყება. წირვაზე დასწრება ორივე ეკლესიის იერარქების, სასულიერო პირებისა და მორწმუნეების მონაწილეობით იგეგმება. წირვის დროს მორწმუნეებს შეეძლებათ თაყვანი სცენ ჰავაის მირონმომდინარე ღვთისმშობლის ივერონულ ხატს და წმინდა ოლღა კვეტლუკელის სიწმინდეს, რომელიც ცოტა ხნის წინ ამერიკის მართლმადიდებლურმა ეკლესიამ წმინდანად შერაცხა.
მაკედონიის მართლმადიდებლურმა ეკლესიამ - ოჰრიდის არქიეპარქიამ ავტოკეფალია 2022 წელს მიიღო სერბეთის მართლმადიდებლური ეკლესიისგან, რითაც დასრულდა ათწლეულების განმავლობაში მიმდინარე კანონიკური იზოლაცია.
შეგახსენებთ, რომ 2025 წლის 21 მაისს, ამერიკის მართლმადიდებლური ეკლესიის წმინდა სინოდმა სპეციალურ სხდომაზე გადაწყვიტა მაკედონიის მართლმადიდებლური ეკლესიის - ოჰრიდის არქიეპარქიის კანონიკურობის აღიარება და სრული ევქარისტიული ზიარების დადასტურება მის ეპისკოპოსებთან, სასულიერო პირებთან და მორწმუნეებთან.
