კვიპროსის მიტროპოლიტმა თურქეთს მართლმადიდებლური სალოცავების განადგურებაში ადანაშაულებს
მიტროპოლიტმა ვასილიოსმა ევროპარლამენტის ყურადღება კვიპროსში მართლმადიდებლური მემკვიდრეობის 51-წლიან განადგურებაზე გაამახვილა.
2025 წლის 1 ივლისს, კვიპროსის მართლმადიდებლური ეკლესიის კონსტანტიისა და ამოქოსტოსის მიტროპოლიტმა ვასილიოსმა ევროპარლამენტს თურქეთის მიერ ოკუპირებულ კვიპროსის ნაწილში მართლმადიდებლური სალოცავების მასშტაბური განადგურების საკითხით მიმართა, იუწყება Orthodoxia News Agency.
მიტროპოლიტმა ვასილიოსმა სიტყვა კვიპროსის კუნძულის ჩრდილოეთ ტერიტორიებზე კულტურული და რელიგიური მემკვიდრეობის შენარჩუნებისადმი მიძღვნილ კონფერენციაზე წარმოთქვა, რომელიც 1974 წლიდან თურქეთის ოკუპაციის ქვეშაა.
მიტროპოლიტმა ვასილიოსმა განადგურების მასშტაბის დამადასტურებელი მონაცემები მოიყვანა: მისი თქმით, ოკუპაციის წლებში 25 ეკლესია განადგურდა ან სერიოზულად დაზიანდა, 24 ეკლესია საწყობებად გადაკეთდა, 17 თავლებად გამოიყენება, 16 მეჩეთებად გადაკეთდა, ხოლო კიდევ 21 ეკლესია მთლიანად დაინგრა ან ჩამოინგრა.
გარდა ამისა, მისი თქმით, ათასობით ხატი მოიპარეს, წმინდა ჭურჭელი გაქრა, მართლმადიდებლური სასაფლაოები კი შეურაცხყვეს და გაძარცვეს.
„ეს არ არის დროის მიერ განადგურება. ეს არის ჩვენი მეხსიერებისა და იდენტობის წაშლის განზრახ მცდელობა“, - განაცხადა მიტროპოლიტმა ევროპარლამენტის ტრიბუნიდან.
მან ასევე მკაცრად დაგმო თურქეთის პოზიცია და ხაზი გაუსვა ევროპული სტრუქტურების უმოქმედობას: „ჩვენ არ ვთხოვთ ევროპას ჩვენთვის ბრძოლას. ჩვენ ვთხოვთ მას დაიცვას საკუთარი ღირებულებები - ღირსება, მეხსიერება, თავისუფლება და კანონის უზენაესობა“.
განსაკუთრებული ყურადღება გამახვილდა ვაროშას ქალაქზე, რომელიც 1974 წლიდან დაკეტილია. 2020 წელს თურქეთის კონტროლის ქვეშ მისი ნაწილობრივი გახსნის შემდეგ, არაერთი ეკლესია დანგრევის საფრთხის წინაშე იდგა და ბევრი მათგანი უკვე განადგურებულია.
მიტროპოლიტმა ასევე აღნიშნა თურქეთის ხელისუფლების მოთხოვნა, აღადგინონ წმინდა ანასტასიოსის მონასტერი პერისტერონოპიგის სოფელში კვიპროსის რესპუბლიკის ხარჯზე - მიუხედავად იმისა, რომ კონსტანტინეს მიტროპოლიას ეკრძალება ამ მონასტერში წირვა-ლოცვის ჩატარება.
კონფერენციის მონაწილეებმა ხაზი გაუსვეს, რომ ქრისტიანული სალოცავების განადგურება 51 წელია მიმდინარეობს და მას ჯერ კიდევ არ მიუღია სათანადო საერთაშორისო შეფასება და რეაგირება.
ადრე, მჟკ-მა დაწერა, რომ კვიპროსის მთავარეპისკოპოსმა მიტროპოლიტ ტიქიკოსს წირვა-ლოცვის ჩატარება აუკრძალა.
