იერუსალიმის ეკლესიამ დაგმო რუსეთის მართლმადიდებლური ეკლესიის დევნა ესტონეთში
იერუსალიმმა მართლმადიდებლურ ეკლესიას ერთიანობისკენ მოუწოდა და შეშფოთება გამოთქვა კანონის გამო, რომელიც ესტონეთში არსებულ სამრევლოებს რუსეთის მართლმადიდებლურ ეკლესიასთან კავშირის გაწყვეტას აიძულებს.
იერუსალიმის საპატრიარქომ ოფიციალური განცხადება გაავრცელა ესტონეთში ცოტა ხნის წინ მიღებულ კანონთან დაკავშირებით, რომელიც რუსეთის მართლმადიდებელი ეკლესიის მორწმუნეების წინააღმდეგაა მიმართული. შეტყობინება იერუსალიმის ეკლესიის ოფიციალურ ვებგვერდზე გამოქვეყნდა.
იერუსალიმის საპატრიარქომ ღრმა შეშფოთება გამოთქვა ესტონეთის პარლამენტის (რიიგიკოგუ) მიერ 9 აპრილს „ეკლესიებისა და სამრევლოების შესახებ“ ახალი კანონის მიღების გამო, რომელიც ეკლესიებს აიძულებს, გაწყვიტონ კავშირი რუსეთის მართლმადიდებლურ ეკლესიასთან. როგორც დოკუმენტშია აღნიშნული, ეს გადაწყვეტილება გავლენას მოახდენს ესტონეთის მასშტაბით ეკლესია-მონასტრებში მცხოვრებ უამრავ მორწმუნეზე.
„იერუსალიმის საპატრიარქო მტკიცედ უჭერს მხარს უსაფრთხო და თავისუფალი ლოცვის უფლებას. იერუსალიმში ჩვენ მწვავედ ვაცნობიერებთ უსაფრთხოების სახელით ღვთისმსახურებაზე დაწესებულ შეზღუდვებს, რასაც ყოველწლიურად ვაწყდებით წმინდა ცეცხლის გარდამავალი ლიტურგიის დროს. არ არსებობს გამართლება მშვიდობიან მოსახლეობაში რელიგიური შეხედულებებისა და პრაქტიკის იარაღად გამოყენებას“, - ხაზგასმულია განცხადებაში.
იერუსალიმის საპატრიარქო მოუწოდებს ესტონეთის მთავრობას, გადახედოს ამ კანონს ესტონეთში მცხოვრები ყველა მორწმუნის საკეთილდღეოდ. „ჩვენს ეკლესიაში ეს კიდევ ერთი მაგალითია ერთიანობის გადაუდებელი საჭიროებისა“, - აღნიშნულია დოკუმენტში.
„მსოფლიო დაიღალა კონფლიქტებით და ამ დროს უაღრესად მნიშვნელოვანია, რომ მართლმადიდებელმა ეკლესიამ ინვესტიცია ჩადოს დიალოგსა და განკურნებაში. ჩვენ ერთი სხეული ვართ, თუმცა ბევრნი ვართ და ერთად უნდა ვიმუშაოთ, რათა ვიყოთ მშვიდობისმყოფელები, რომლებსაც კაცობრიობა ნატრობს. ჩვენ ამის გაკეთება არ შეგვიძლია, თუ განხეთქილებები და უთანხმოება გვატანჯავს“, - ნათქვამია განცხადებაში.
იერუსალიმის საპატრიარქო აღიარებს ევროპასა და მთელ მსოფლიოში ამ რთულ დროს არსებულ გამოწვევებს, ტკივილსა და განხეთქილებას და კვლავ მოუწოდებს დიალოგსა და შერიგებაზე დაფუძნებული ძმური დისკუსიებისკენ.
დასასრულს, იერუსალიმის საპატრიარქო, შერიგებისა და მშვიდობის დამყარების მრავალსაუკუნოვანი გამოცდილების საფუძველზე, კეთილი ნებისა და შუამავლობის ხელს უწვდის პატრიარქ ძმებს: „შევიკრიბოთ, რათა დავთესოთ მშვიდობისა და განკურნების თესლი, რათა შევძლოთ ტანჯვის დასრულება და განკურნების ხელშეწყობა მართლმადიდებლურ ოჯახში“.
მჟკ-მა დაწერა, რომ ესტონეთის პრეზიდენტმა უარი თქვა ესტონეთის ეკლესიის აკრძალვის შესახებ კანონის ხელმოწერაზე.
