გიგანტური წიგნების პროექტის პირველი გამოცემის პრეზენტაცია გაიმართა
ეროვნულ ბიბლიოთეკაში წარდგენილი იქნა „ივერიის“ 1886 წლის სრული გამოცემა.
საქართველოს ეროვნული ბიბლიოთეკა უნიკალური ინიციატივით — „გიგანტური წიგნების“ პროექტით — კულტურული მემკვიდრეობის შენარჩუნებასა და საზოგადოებისთვის ხელმისაწვდომობას უწყობს ხელს. პროექტის ფარგლებში იგეგმება XIX და XX საუკუნის დასაწყისის ქართული პერიოდული გამოცემების ორიგინალური ზომითა და ფორმით დაბეჭდვა, რაც ხელს შეუწყობს ისტორიული მასალების გადარჩენასა და ფართო საზოგადოებისთვის გაცნობას.
მჟკ გამცნობთ, რომ საქართველოს ეროვნულ ბიბლიოთეკაში გაიმართა პროექტ „გიგანტური წიგნების“ პირველი გამოცემის წარდგინება. წარმოდგენილი იყო წმინდა ილია მართლის (ჭავჭავაძის) რედაქტორობით გამომავალი გაზეთ „ივერიის“ 1886 წლის სრული კომპლექტი, რომელიც სპეციალურად დამზადდა ორიგინალის ზუსტი ზომისა და ფორმატის მიხედვით.
გამოცემის მომზადებისას განსაკუთრებული ყურადღება დაეთმო გაზეთის დაზიანებული გვერდების რესტავრაციას, რაც პროექტის ერთ-ერთ მთავარ მიღწევად იქცა.
ღონისძიება საქართველოს ეროვნული ბიბლიოთეკის დირექტორმა, კონსტანტინე გამსახურდიამ, გახსნა. მისი თქმით, პროექტი მომავალშიც გაგრძელდება და ეტაპობრივად გამოიცემა XIX საუკუნისა და XX საუკუნის დასაწყისის მნიშვნელოვანი ქართული პერიოდული გამოცემების გიგანტური ასლები.
ინიციატივის მიზანია, ერთის მხრივ, ბიბლიოთეკის საცავებში დაცული უნიკალური დედნების დაცვა და გადარჩენა, ხოლო მეორეს მხრივ, ამავე მასალების ფართო საზოგადოებისთვის ხელმისაწვდომობის გაზრდა. პროექტი წარმოადგენს მნიშვნელოვან ნაბიჯს ეროვნული მეხსიერების შენარჩუნებისა და კულტურული ფასეულობების პოპულარიზაციის საქმეში.
მართლმადიდებელ ჟურნალისტთა კავშირი წერდა, მიტროპოლიტი შიო: ჯვრის ძალა და სიყვარულის გზაზე ყოფნა.
