ომის წლები. როგორ უნდა მოიქცეს მართლმადიდებელი ქრისტიანი ომის დროს?
ომი ყველაზე ცუდი რამაა, რაც შეიძლება ადამიანს თავს დაატყდეს. დღეს, გამეფებული არასტაბილურობისა და ზოგიერთ რაიონში ომების მძვინვარების სამყაროში, მთელ მსოფლიოში მართლმადიდებელი ქრისტიანები დიდი განსაცდელების წინაშე დგანან.
ჩვენ შეგვიძლია შევხვდეთ ადამიანებს, რომლებიც ასეთ საშინელ ვითარებაში ირჩევენ მხარეს და გულშემატკივრობენ ერთ-ერთი მეომარი მხარის გამარჯვებას, თითქოს ეს სპორტული შეჯიბრი იყოს.
მართლმადიდებელ ჟურნალისტთა კავშირის სერბული რედაქცია თავის მკითხველს წარმოუდგენს ინტერვიუს ოპოჩას მღვდელთან, ივან ბარაევაცთან. მან გაგვიზიარა, თუ რა პოზიცია უნდა ეჭიროს მართლმადიდებელ ქრისტიანს და როგორ უნდა უპასუხოს ომს.
,,სამყაროსა და ადამიანის ცხოვრებაში ყველა პერიოდს თავის დატვირთვა აქვს, ასევე მშვიდობისა და სტაბილურობის პერიოდებსაც. იყო და იქნება ომები, მაგრამ ჩვენ, როგორც მართლმადიდებელმა ქრისტიანებმა, ყველა სიტუაციაში სიმშვიდე უნდა შევინარჩუნოთ, ღვთის წყალობასა და ამქვეყნიურ სიყვარულზე დაყრდნობით.
იმის გათვალისწინებით, რომ ამ ცხოვრებაში არაფერი ხდება ღვთის ნების გარეშე, ყველა არეულობა და ცდუნება უნდა იქნას მიღებული და უფლისადმი მშვიდობისა და უკეთესი დღეებისთვისუნდა ვილოცოთ.
ხალხში გავრცელებული ფრაზაა: უსიამოვნების გარეშე არ არსებობს ლოცვა. მართლაც, როდესაც ისტორიაში ყოფილა ომები, დევნა, ადამიანების რწმენა უფრო ძლიერი და ურყევი იყო, ვიდრე ოდესმე.
მარხვა, ლოცვა, თავმდაბლობა, მონანიება, ღვთისა და მოყვასის სიყვარული საუკეთესო იარაღია ამქვეყნიური ცდუნებების წინააღმდეგ ბრძოლაში. თავად ჩვენმა უფალმა და მხსნელმა იესო ქრისტემ თქვა, რომ ამ ჯიშის განდევნა მხოლოდ ლოცვითა და მარხვით არის შესაძლებელი და რომ ეს აუცილებელია და სასარგებლოა მომავალი ცდუნებების თავიდან ასაცილებლად, რადგან, უფლის ძმის, წმინდა მოციქულის, იაკობის სიტყვების თანახმად, ადამიანი ცდუნებებში იწრთობა და სულიერად გარდაიქმნება, როგორც ლითონი ცეცხლში.
ცეცხლი არბილებს ლითონს, სასურველი ფორმის მისაღწევად. ასევე, თუ ადამიანი განსაცდელებსა და გასაჭირში აღმოჩნდება, ბოლომდე გაუძლებს, ღვთის დახმარებას ენდობა, ღვთის მცნებების შესაბამისად იცხოვრებს, მიაღწევს ადამიანური ცხოვრებისა და არსებობის მიზანს ამქვეყნად, რაც არის მარადიული სიცოცხლე და ზიარება ცოცხალ სამებასთან ჭეშმარიტ ღმერთთან ჩვენი უფლის იესო ქრისტეს მეშვეობით.''
