პრეზიდენტი: „ქვეყნის მომავალი ისტორიულ მემკვიდრეობას უნდა ეფუძნებოდეს“

საქართველოს პრეზიდენტი მიხეილ ყაველაშვილი. ფოტო: Mikheil Kavelashvili

საქართველოს პრეზიდენტმა საერთაშორისო სიმპოზიუმზე „ღმერთი, სამშობლო, ადამიანი“ სიტყვით გამოსვლისას ქართული სახელმწიფოებრიობის, ეროვნული თვითმყოფადობისა და საზოგადოებრივი ერთიანობის განმტკიცებაში ქრისტიანული რწმენისა და ტრადიციული ღირებულებების როლზე გაამახვილა ყურადღება.

ღონისძიება საქართველოში ქრისტიანობის სახელმწიფო რელიგიად გამოცხადების 1700 წლის იუბილეს მიეძღვნა. პრეზიდენტი სიმპოზიუმს მეუღლესთან ერთად დაესწრო. ღონისძიებაში მონაწილეობდნენ სრულიად საქართველოს კათოლიკოს-პატრიარქი შიო III, საქართველოს პრემიერ-მინისტრი და პარლამენტის თავმჯდომარე.

პრეზიდენტმა გამოსვლაში გამოყო შვიდი ღირებულება — ღმერთი, სამშობლო, ადამიანი, მამული, ენა, სარწმუნოება და ოჯახი, რომლებიც, მისი შეფასებით, ქართული ეროვნული თვითმყოფადობისა და სახელმწიფოებრივი აზროვნების საფუძველს წარმოადგენდა.

„ღმერთი, სამშობლო, ადამიანი, მამული, ენა, სარწმუნოება და ოჯახი — ეს შვიდი მარადიული ღირებულება ჩვენი ეროვნული თვითმყოფადობის, სახელმწიფოებრივი აზროვნებისა და საზოგადოებრივი ერთიანობის საფუძველია“, — განაცხადა პრეზიდენტმა.

მისი განმარტებით, აღნიშნული ღირებულებითი ერთიანობა წმინდა ილია მართლის ეროვნულ ტრიადასა და უწმინდესი ილია II-ის სულიერ მემკვიდრეობას ეფუძნებოდა და ქართული აზროვნების მრავალსაუკუნოვან ტრადიციას აერთიანებდა. ამ კონტექსტში მან შოთა რუსთაველისა და ვაჟა-ფშაველას შემოქმედებითი მემკვიდრეობის მნიშვნელობაც გამოკვეთა.

პრეზიდენტმა ყურადღება გაამახვილა გლობალიზაციისა და ხელოვნური ინტელექტის ეპოქაში ადამიანის იდენტობის შენარჩუნების საკითხზე. მისი შეფასებით, სულიერი და ეროვნული ღირებულებებით ახალგაზრდების აღზრდა საზოგადოების ზნეობრივ სიმტკიცეს, დაცულობასა და თანაგრძნობის უნარს განამტკიცებდა.

„ამ იდეალებით აღზრდილი ქართველი ახალგაზრდობა არის გარანტი იმისა, რომ ჩვენი საზოგადოება იქნება ბევრად უფრო დაცული, პროგრესული, მორალურად მყარი და ემპათიური“, — აღნიშნა მან.

გამოსვლისას პრეზიდენტმა განაცხადა, რომ საქართველოს ისტორიის განმავლობაში ქრისტიანული რწმენა და ეროვნული ფასეულობები სახელმწიფოებრიობის შენარჩუნების საყრდენს წარმოადგენდა. მან მომავალი თაობებისთვის როგორც ძლიერი სახელმწიფოს, ისე სულიერი და ეროვნული მემკვიდრეობის გადაცემის პასუხისმგებლობაზე ისაუბრა.

„მჯერა, რომ ჩვენი ქვეყნის მომავალი სწორედ ისტორიული მემკვიდრეობისა და თანამედროვე განვითარების ჰარმონიულ ერთიანობას უნდა ეფუძნებოდეს. ჩვენი ვალია, მომავალ თაობებს გადავცეთ არა მხოლოდ ძლიერი სახელმწიფო, არამედ ის სულიერი და ეროვნული ფასეულობები, რომლებიც საქართველოს გამოარჩევს“, — განაცხადა პრეზიდენტმა.

სიტყვის დასასრულს მან საქართველოს მშვიდობიანი და სუვერენული მომავლის მშენებლობისთვის ისტორიული მემკვიდრეობის ერთგულებისა და პასუხისმგებლიანი სახელმწიფოებრივი პოლიტიკის მნიშვნელობას გაუსვა ხაზი.

„ისტორიული მემკვიდრეობის ერთგულებითა და პასუხისმგებლიანი სახელმწიფოებრივი პოლიტიკით უნდა ავაშენოთ ჩვენი ქვეყნის ძლიერი, მშვიდობიანი და სუვერენული მომავალი. ღმერთმა დალოცოს საქართველო!“ — აღნიშნა საქართველოს პრეზიდენტმა.

მართლმადიდებელ ჟურნალისტთა კავშირი წერდა, საქართველოს პრეზიდენტი მილოცვის წერილს აქვეყნებს.

წაიკითხეთ ასევე