სასულიერო სემინარიაში თეოლოგიის ფაკულტეტის სტუდენტებმა საბაკალავრო ნაშრომები დაიცვეს

სასულიერო სემინარიის ფაკულტეტის სტუდენტთა სადიპლომო ნაშრომების დაცვა.

29 ივნისს სასულიერო სემინარიის თეოლოგიის ფაკულტეტზე საბაკალავრო სადიპლომო ნაშრომების დაცვა გაიმართა. სტუდენტების ნამუშევრები შეაფასა სპეციალურად დაკომპლექტებულმა კომისიამ, რომლის შემადგენლობაშიც სასულიერო პირები და თეოლოგიური სფეროს წარმომადგენლები შედიოდნენ.

კომისიის წინაშე საკუთარი ნაშრომები წარადგინეს მიხეილ ნურაშვილმა, დავით ღირსიაშვილმა და ბაჩანა აბურჯანიამ.

მიხეილ ნურაშვილის ნაშრომი – „ბიბლიურ საკუთარ სახელებში დაცული სიმბოლიკის საეკლესიო ეგზეგეტიკა“ – ბიბლიურ საკუთარ სახელებში არსებული სიმბოლური მნიშვნელობებისა და მათი საეკლესიო განმარტების კვლევას მიეძღვნა.

დავით ღირსიაშვილის ნაშრომში – „განღმრთობა — ღმერთისა და ადამიანის თანაზიარება საეკლესიო სწავლების მიხედვით“ – განხილულია მართლმადიდებლური სწავლება ადამიანის შექმნის მიზნის, ცოდვით დაცემის, ხატისა და მსგავსების აღდგენისა და მაცხოვრის განკაცების მნიშვნელობის შესახებ.

ბაჩანა აბურჯანიამ ნაშრომში „საეკლესიო ქონების მართვა და ეკლესიის აღმშენებლობა“ ეკლესიის ქონების მართვისა და განკარგვის კანონიკური და სამართლებრივი საფუძვლები, ასევე ამ მიმართულებით საეკლესიო პირთა უფლებამოსილებები მიმოიხილა.

ნაშრომების განხილვის შემდეგ შემფასებელმა კომისიამ სამივე სტუდენტის ნამუშევარი დადებითად შეაფასა. შედეგად, მიხეილ ნურაშვილს, დავით ღირსიაშვილსა და ბაჩანა აბურჯანიას თეოლოგიის ბაკალავრის აკადემიური ხარისხი მიენიჭათ.

სადიპლომო ნაშრომების დაცვას ესწრებოდნენ სასწავლებლის პრორექტორები, პროფესორ-მასწავლებლები და სტუდენტები.

მართლმადიდებელ ჟურნალისტთა კავშირი ადრე წერდა, რომ თბილისის სასულიერო აკადემია Erasmus+ პროგრამაში მონაწილეობის მსურველებისთვის კონკურსს აცხადებს.

წაიკითხეთ ასევე