მზადდება წმინდა გიორგი აღმსარებელზე გადაღებული ფილმის ქართული ვერსია
ფილმის თარგმნა და ქართულად გახმოვანება დეკემბერში დასრულდება.
ქართველი მაყურებლისთვის მზადდება დოკუმენტური ფილმის ქართული ვერსია, რომელიც წმინდა გიორგი აღმსარებლის (კარსლიდისის) ცხოვრებასა და მოღვაწეობას ეძღვნება. ღირსმა მამამ სამონაზვნო გზა საქართველოში დაიწყო, მოგვიანებით კი საბერძნეთში, დრამის მახლობლად, უფლის ამაღლების სახელობის მონასტერი ააშენა.
ღირსი გიორგი 1902 წლის 18 იანვარს წალკის რაიონის სოფელ ხადიკში, იმავე ტბეთში, დაიბადა. მას ათანასე უწოდეს. ბავშვობიდან ხშირად დადიოდა მონასტერში და ადრეული ასაკიდანვე შეუდგა სულიერ ცხოვრებას. აფხაზეთში, დრანდის მონასტერში, არქიმანდრიტმა გიორგი წულაიამ იგი მცირე სქემაში აღკვეცა და სვიმეონი უწოდა. მოგვიანებით მისმა სულიერმა მოძღვარმა, ცხუმ-აფხაზეთის მთავარეპისკოპოსმა იოანემ (მარღიშვილმა), იგი დიდ სქემაში გიორგის სახელით აღკვეცა და მღვდლადაც აკურთხა.
გასული საუკუნის 30-იან წლებში მამა გიორგი საბერძნეთში გაემგზავრა და დრამის მუნიციპალიტეტის სოფელ სიფსაში დამკვიდრდა. იქ, მის მიერ აშენებულ ამაღლების მონასტერში, სიცოცხლის ბოლომდე მსახურობდა. საეკლესიო გადმოცემით, ღირს მამას წინასწარმეტყველების ნიჭი ჰქონდა და მის ლოცვას არაერთი სასწაული უკავშირდება. სულიერი რჩევისა და ნუგეშის მისაღებად მას სხვადასხვა კუთხიდან აკითხავდნენ.
წმინდა გიორგიმ საქართველოსა და ქართველი ხალხის სიყვარული სიცოცხლის ბოლომდე შეინარჩუნა. საბერძნეთშიც წირვა-ლოცვას ქართულად აღავლენდა. მისი ანდერძი იყო, საქართველოდან წაღებული შესამოსლით დაეკრძალათ და საფლავში ქართული
ჯვარი და სახარება ჩაეყოლებინათ.
ღირსი გიორგი 1959 წლის 2 ნოემბერს აღესრულა. 2008 წელს იგი წმინდანად შერაცხეს. მისი ხსენება საეკლესიო კალენდრით 4 ნოემბერს, ახალი სტილით კი 17 ნოემბერს აღინიშნება.
მართლმადიდებელ ჟურნალისტთა კავშირი წერდა, რომ რეჟისორი გიორგი კაჭარავა ფილმზე „ბრძოლა — ბერი გაბრიელი“ საუბრობს.
