ეპისკოპოსი საბა ბერძნულ მართლმადიდებლურ საკათედრო ტაძარში იმსახურებს
6–8 ნოემბერს დაგეგმილი ვიზიტის ფარგლებში ჩრდილოეთ ამერიკის ეპისკოპოსი ადგილობრივ ქართველ და ბერძენ მართლმადიდებელ მრევლს შეხვდება.
2026 წლის 6, 7 და 8 ნოემბერს, ამერიკის ბერძნული სამთავარეპისკოპოსოს მეთაურის, მთავარეპისკოპოს ელპიდოფოროსის ლოცვა-კურთხევით, ჩრდილოეთ ამერიკის ეპისკოპოსი საბა ყოვლადწმინდა ღვთისმშობლის მიძინების სახელობის ბერძნულ მართლმადიდებლურ საკათედრო ტაძარს ეწვევა.
ვიზიტის პროგრამა მოიცავს მწუხრის ლოცვას, სამღვდელმთავრო საღმრთო ლიტურგიასა და ეპისკოპოს საბას საპატივცემულოდ გამართულ საზეიმო მიღებას. მღვდელმთავარი ადგილობრივ ქართველ და ბერძენ მართლმადიდებელ მრევლსაც შეხვდება.
ვიზიტისა და მასთან დაკავშირებული ღონისძიებების დაგეგმვა ორივე საეკლესიო იურისდიქციის წარმომადგენელთა თანამშრომლობით განხორციელდა. ორგანიზებაში უშუალოდ მონაწილეობდნენ ამერიკის ბერძნული სამთავარეპისკოპოსოს წარმომადგენელი და საკათედრო ტაძრის წინამძღვარი, პროტოპრესვიტერი ალექსანდრე კარლუცოსი და ჩრდილოეთ ამერიკის ეპარქიის მდივანი, მღვდელმონაზონი იერონიმე (ქათამაძე).
ჩრდილოეთ ამერიკის ეპარქიამ მადლიერება გამოხატა მასპინძელი ტაძრის სასულიერო პირების, სამრევლო საბჭოსა და მრევლის მიმართ. განსაკუთრებული მადლობა გადაუხადა საორგანიზაციო კომიტეტის წევრებს: ანა ალიაიძე-თორღვაიძეს, კონსტანტინე ბელადიძეს, ლევან (ლეო) ბელადიძეს, სამრევლო საბჭოს პრეზიდენტ გუს კარპატაკისს, ნანა ხიდაშელს, იზაბელ შუკასსა და გიორგი თრაგვაიძეს. ეპარქიამ ასევე აღნიშნა პრესვიტერა ქსანთი კარლუცოსისა და ანასტასია კარლუცოს-ლაზარაკისის თანადგომა.
ეპარქიის განცხადებით, დაგეგმილი შეხვედრები ქართულ და ბერძნულ მართლმადიდებელ სამრევლოებს შორის არსებული ძმური ურთიერთობებისა და სულიერი ერთობის გამოხატულებაა და ამ კავშირების შემდგომ განმტკიცებას შეუწყობს ხელს.
მართლმადიდებელ ჟურნალისტთა კავშირი წერდა, ეპისკოპოსმა საბამ კანადაში საქართველოს საელჩოში პარაკლისი აღავლინა.
