მართლმადიდებელი ეკლესია წმინდა დავით თესალონიკელის ხსენების დღეს აღნიშნავს
V–VI საუკუნეების დიდი ასკეტი და სასწაულთმოქმედი წმინდანი ქრისტიანებს ლოცვის, სიმდაბლისა და ღვთისადმი სრული ერთგულების მაგალითს უტოვებს.
მართლმადიდებელი სამოციქულო ეკლესია 8 ივლისს წმინდა დავით თესალონიკელის ხსენების დღეს აღნიშნავს. ღირსი მამა V–VI საუკუნეების მიჯნაზე მოღვაწეობდა და ეკლესიის ისტორიაში ერთ-ერთ გამორჩეულ ასკეტად და სასწაულთმოქმედად არის ცნობილი.
წმინდა დავითმა ახალგაზრდობაშივე დატოვა მშობლიური მესოპოტამია, უარი თქვა ამქვეყნიურ ცხოვრებაზე და ბერად აღიკვეცა თესალონიკის წმინდა მოწამე თეოდორესა და მერკურის სახელობის მონასტერში. მოგვიანებით ქალაქის მახლობლად, ნუშის ხის ქვეშ მოიწყო სამოღვაწეო ადგილი, სადაც განუწყვეტლივ ლოცულობდა, მკაცრად მარხულობდა და უდიდესი მოთმინებით იტანდა ყოველგვარ განსაცდელს.
ღვთისადმი ერთგულებისა და წმინდა ცხოვრების გამო უფალმა მას სასწაულთმოქმედების ნიჭი მიმადლა. გადმოცემის თანახმად, ერთხელ წმინდა დავითმა მეფის წინაშე ხელისგულზე გავარვარებული ნახშირი დაიდო, ზედ საკმეველი დააყარა და ისე აკმია, თუმცა ხელი არ დაწვია. ამ სასწაულმა მეფე და იქ მყოფნი ღრმად გააოცა. წმინდა მამა ასევე მრავალი სნეულის კურნებითა და სულიერი დამოძღვრით იყო ცნობილი.
წმინდა დავით თესალონიკელი დაახლოებით 540 წელს მშვიდობით აღესრულა. მისი გარდაცვალებიდან მრავალი წლის შემდეგ საფლავის გახსნისას წმინდანის სხეული უხრწნელი აღმოჩნდა, რაც ეკლესიისთვის მისი სიწმინდის კიდევ ერთი დასტური გახდა.
1222 წელს წმინდა დავითის უხრწნელი ნაწილები იტალიაში გადაასვენეს, ხოლო 1978 წელს ისინი კვლავ თესალონიკში დააბრუნეს. საუკუნეების განმავლობაში მის წმინდა ნაწილებთან მრავალი სასწაული აღესრულებოდა, რის გამოც წმინდა დავით თესალონიკელი დღემდე განსაკუთრებული პატივით იხსენიება მართლმადიდებელ ეკლესიაში.
მართლმადეიდებელ ჟურნალისტთა კავშირი წერდა, რომ 1 ივლისს მართლმადიდებელი ეკლესია ღირს მიქაელ ულუმბოელის ხსენებას აღნიშნავს.
