პრაღაში წმინდა გაბრიელისა და ღვთისმშობლის წილხვედრობის ხატები წმინდა ნაწილებთან ერთად ჩამოაბრძანეს

დღეს, 2 ივლისს, პრაღაში, წმინდა კირილესა და მეთოდეს საკათედრო ტაძარში, ხატები „საქართველო — ყოვლადწმინდა ღვთისმშობლის წილხვედრი“ და „წმინდა გაბრიელ ურგებაძე“, მათ წმინდა ნაწილებთან ერთად, საზეიმოდ ჩამოაბრძანეს.

ტაძარში შეკრებილი მრავალი მორწმუნე ხატებზე სამთხვევად რიგში დგას. ღონისძიებას ესწრება პრაღისა და ჩეხეთის მთავარეპისკოპოსი მიქაელი.

ამ დროისთვის სასულიერო პირები საღვთო ლიტურგიისთვის ემზადებიან, რომელიც ქართულ ენაზე აღევლინება. აღნიშნული მოვლენა პრაღაში მცხოვრები ქართველი მართლმადიდებლებისთვის განსაკუთრებული სულიერი მნიშვნელობისაა და მორწმუნეებს შესაძლებლობას აძლევს, თაყვანი სცენ წმინდა ხატებსა და წმინდა ნაწილებს.

წმინდა გაბრიელი, ერისკაცობაში გოდერძი ვასილის ძე ურგებაძე, დაიბადა 1929 წლის 26 აგვისტოს თბილისში, ხოლო მიიცვალა 1995 წლის 2 ნოემბერს მცხეთაში, სამთავროს დედათა მონასტერში. გარდაცვალებამდე მცირე ხნით ადრე, საქართველოს კათოლიკოს-პატრიარქმა ილია II-მ იგი არქიმანდრიტის ხარისხში აღაზენა.

1965 წლის 1 მაისს, საბჭოთა აღლუმის დროს, მამა გაბრიელმა საჯაროდ დაწვა ლენინის 12-მეტრიანი პორტრეტი. დაკითხვაზე მან განაცხადა:

„იქ უნდა ეკიდოს ქრისტეს ჯვარცმა და არა — ლენინის სურათი. კაცს რად უნდა დიდება — უნდა ეწეროს: დიდება ქრისტე ღმერთს.“

ამის გამო იგი დაპატიმრეს, აწამეს და ფსიქიატრიულ საავადმყოფოში მოათავსეს. მიუხედავად ტანჯვისა, ღირსმა მამამ არ უარყო სარწმუნოება და ბოლომდე დარჩა ქრისტესადმი ერთგული.

მართლმადიდებელ ჟურნალისტთა კავშირი წერდა, 2 ნოემბერი ღირსი მამა, აღმსარებელი და სალოსი, მამა გაბრიელის ხსენების დღეა.