ბათუმისა და ლაზეთის ეპარქიაში საეპარქიო საბჭოს სხდომა გაიმართა
კრებაზე განიხილეს 142-ე პატრიარქის არჩევასთან დაკავშირებული საკითხები;
2026 წლის 23 აპრილს ბათუმისა და ლაზეთის ეპარქიაში გაიმართა საეპარქიო საბჭოს სხდომა, რომლის მთავარი საკითხი მართლმადიდებელი ეკლესიის XIV გაფართოებული კრების დელეგატთა დამტკიცება იყო. აღნიშნული კრება განსაკუთრებულ მნიშვნელობას ატარებს, ვინაიდან მის ფარგლებში მოხდება რიგით 142-ე პატრიარქის გამორჩევა.
სხდომას ხელმძღვანელობდა ბათუმისა და ლაზეთის მიტროპოლიტი დიმიტრი, რომელმაც შეხვედრაზე განსაკუთრებული ყურადღება გაამახვილა სრულიად საქართველოს კათოლიკოს-პატრიარქის, ილია II-ის მრავალწლოვან და განსაკუთრებულად მნიშვნელოვან მსახურებაზე. მიტროპოლიტმა ხაზი გაუსვა პატრიარქის ნახევარსაუკუნოვან ღვაწლს, მის გამორჩეულ როლს როგორც ეკლესიის, ისე ქვეყნის სულიერ და ეროვნულ გაძლიერებაში, ასევე ეკლესიის დამოუკიდებლობის განმტკიცებაში.
საეპარქიო საბჭოს წევრებს მიტროპოლიტმა დიმიტრიმ დეტალური ინფორმაცია მიაწოდა XIV გაფართოებული კრების შესახებ, მათ შორის — კრების მნიშვნელობაზე, პროცედურებზე და მონაწილე დელეგატთა შემადგენლობაზე. შეხვედრაზე ასევე დასახელდა ის პირები, რომლებიც ბათუმისა და ლაზეთის ეპარქიას აღნიშნულ კრებაზე წარმოადგენენ.
დელეგატთა შორის არიან როგორც სასულიერო, ასევე საერო პირები. კერძოდ, ორი სასულიერო და ერთი საერო წარმომადგენელია: დეკანოზი გიორგი მულაძე, დეკანოზი ბასილი ბერიძე და ივანე (მამუკა) გიორგაძე.
კრებაზე ასევე წარმოდგენილი იქნება ბათუმის წმინდა იოანე ღვთისმეტყველის სახელობის სასულიერო სემინარია, რომლის დელეგატები არიან რექტორი დეკანოზი გიორგი შაინიძე და პრორექტორი დეკანოზი ილია ხინიკაძე.
ეპარქიის მონასტრებიდან დელეგატებად დასახელდნენ: ჯვრის ამაღლების მამათა მონასტრიდან არქიმანდრიტი მაქსიმე ბეჭვაია; ხინოს წმინდა იოანე ნათლისმცემლის თავისკვეთის მამათა მონასტრიდან არქიმანდრიტი ევდემოზი დიასამიძე; აღდგომის სახელობის მამათა მონასტრიდან არქიმანდრიტი გრიგოლი წულაია; თეთროსნის წმინდა გიორგის მამათა მონასტრიდან იღუმენი სერგი გოგოლი; იერუსალიმის ღვთისმშობლის ხატის სახელობის მამათა მონასტრიდან მღვდელმონაზონი გაბრიელი სამადაშვილი და დეკანოზი დიმიტრი სარჯველაძე.
დედათა მონასტრებიდან დელეგატები არიან: ფერიის ყოველთა ქართველთა წმინდანთა მონასტრიდან იღუმენია სიდონია დარჩია და დეკანოზი დავით მურცხვალაძე; სამების მონასტრიდან იღუმენია ანა მაისურაძე და დეკანოზი იაკობ ბენიძე; სარფის წმინდა იოანე ღვთისმეტყველის მონასტრიდან იღუმენია ეფემია დუმბაძე და მონაზონი მარიამი პირველაშვილი; ვარჯანულის ქეთევან დედოფლის სახელობის მონასტრიდან იღუმენია თეკლა ბურჯანაძე და დეკანოზი სერგი რუხაძე.
ასევე, სარფის ლაზ მოწამეთა მამათა მონასტრიდან დელეგატად დასახელდა არქიმანდრიტი ეგნატე კეკელიძე.
სხდომის დასასრულს მიტროპოლიტმა დიმიტრიმ საბჭოს წევრების მიერ დასმულ კითხვებს უპასუხა.
მართლმადიდებელ ჟურნალისტთა კავშირი წერდა, 25 აპრილს, პატრიარქის გარდაცვალებიდან მე-40 დღეს, საფრანგეთში პანაშვიდი აღევლინება.
