მიტროპოლიტ შიოს ქადაგება მართლმადიდებლობის ზეიმზე
საპატრიარქო ტახტის მოსაყდრემ დიდმარხვის პირველ კვირას ხატთაყვანისცემის სარწმუნოებრივი საფუძველი განმარტა და პატრიარქ ილია II-ის ღვაწლზე ისაუბრა.
საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი), დიდმარხვის პირველ კვირას, მართლმადიდებლობის ზეიმზე წარმოთქმულ ქადაგებაში მორწმუნეებს მიულოცა ეს მნიშვნელოვანი დღე და ისაუბრა მართლმადიდებლური სარწმუნოების უმნიშვნელოვანეს ჭეშმარიტებებზე, ადამიანის ღვთის ხატად შექმნის მნიშვნელობასა და დიდმარხვის სულიერ დანიშნულებაზე.
მიტროპოლიტმა განმარტა, რომ მართლმადიდებლობის ზეიმი უკავშირდება მეშვიდე მსოფლიო კრებას, რომელიც 787 წელს გაიმართა და სადაც საბოლოოდ დადასტურდა ხატთაყვანისცემის სარწმუნოებრივი ჭეშმარიტება. მისი თქმით, იმ პერიოდში ეკლესიის წინაშე იდგა მნიშვნელოვანი კითხვა – შეიძლებოდა თუ არა უხილავი ღმერთის გამოსახვა ხატით.
როგორც მიტროპოლიტმა აღნიშნა, ეკლესიის მამებმა ამ კითხვას დადებითი პასუხი გასცეს, რადგან ღმერთის განკაცებამ სრულიად ახალი რეალობა შექმნა.
„ღმერთი თავისი ბუნებით უხილავია და მიუწვდომელია, მაგრამ განკაცებით იგი გაცხადდა ადამიანისთვის. ძე ღმერთმა მიიღო ადამიანური ბუნება, გახდა ხილული და მისაწვდომი. სწორედ ამიტომ გახდა შესაძლებელი მისი გამოსახვა ხატებში, რადგან განკაცებით ღმერთმა გამოავლინა თავი სამყაროს წინაშე,“ – აღნიშნა მან.
მიტროპოლიტ შიოს თქმით, ეს ჭეშმარიტება მჭიდროდ უკავშირდება ადამიანის ბუნებასაც, რადგან ადამიანი თავად არის შექმნილი ღვთის ხატად და მსგავსად.
მისი განმარტებით, მიუხედავად ცოდვით დაცემისა და ადამიანის ბუნების დაზიანებისა, ღვთის ხატება ადამიანში რჩება როგორც მისი სულიერი საფუძველი და ღირსება.
„ადამიანი არის ღვთის გამოუთქმელი დიდების ხატი. ეს არის ჩვენი შინაგანი ბუნება და საფუძველი. ეკლესია დღეს გვახსენებს ამ ჭეშმარიტებას, გვახსენებს იმ სიკეთესა და სინათლეს, რომელიც ღმერთმა ჩადო თითოეულ ადამიანში,“ – განაცხადა მიტროპოლიტმა.
ქადაგებისას განსაკუთრებული ყურადღება დაეთმო დიდმარხვის სულიერ მნიშვნელობას. მიტროპოლიტმა აღნიშნა, რომ დიდი მარხვა არის სინანულის, სულიერი განახლებისა და ღმერთთან დაახლოების პერიოდი, თუმცა სინანული არ ნიშნავს მხოლოდ საკუთარი ცოდვების დანახვას, არამედ საკუთარი სულიერი ღირსების გაცნობიერებასაც.
მისი თქმით, როდესაც ადამიანი საკუთარ თავში მხოლოდ ცოდვას ხედავს და ვერ ამჩნევს ღვთის მიერ ბოძებულ სიკეთეს, იგი შეიძლება ჩავარდეს სასოწარკვეთილებაში, რაც სულიერ ცხოვრებას აზიანებს.
„სწორი სინანული შესაძლებელია მხოლოდ მაშინ, როდესაც ადამიანი ხედავს იმ სიკეთეს, რომელიც ღმერთმა ჩადო მასში. ეკლესია დიდმარხვაში გვახსენებს ჩვენს ღვთაებრივ მოწოდებას, რათა არ ჩავვარდეთ სასოწარკვეთილებაში და განვიმტკიცოთ სულიერი ძალა,“ – აღნიშნა მან.
მიტროპოლიტმა ასევე განმარტა, რომ დიდმარხვის თითოეული კვირა მორწმუნეებს ეტაპობრივად ამზადებს სულიერი აღზევებისთვის. მისი თქმით, მართლმადიდებლობის ზეიმის შემდეგ ეკლესია მორწმუნეებს ახსენებს წმინდა გრიგოლ პალამას სწავლებას, ჯვრის თაყვანისცემის მნიშვნელობას, წმინდა იოანე კიბისაღმწერლის სულიერ გზას და წმინდა მარიამ ეგვიპტელის მაგალითს, რაც სულიერი განწმენდისა და ღმერთთან დაახლოების გზას აჩვენებს.
ქადაგებისას მიტროპოლიტმა შიომ მორწმუნეებს მოუწოდა, სულიერი ცხოვრება ქმედითი სიყვარულითა და კეთილი საქმეებით განამტკიცონ.
„ჩვენ უნდა ვუპასუხოთ ეკლესიის მოწოდებას სულიერი ღვაწლით, სიყვარულით, კეთილგანწყობით ადამიანებისადმი და მათი კეთილი მისწრაფებების მხარდაჭერით. ეს არის გზა, რომელიც ღმერთთან გვაახლოვებს,“ – განაცხადა მან.
მიტროპოლიტმა შიომ ასევე ისაუბრა საქართველოს ეკლესიის ისტორიის ერთ-ერთ მნიშვნელოვან მოვლენაზე და აღნიშნა, რომ მართლმადიდებლობის ზეიმის დღეს, 1990 წელს, კონსტანტინოპოლის საპატრიარქომ ოფიციალურად აღიარა საქართველოს მართლმადიდებელი ეკლესიის ავტოკეფალია.
მისი თქმით, ეს იყო მრავალსაუკუნოვანი ბრძოლისა და ღვაწლის შედეგი, რომელიც სრულიად საქართველოს კათოლიკოს-პატრიარქ ილია II-ის ძალისხმევით დაგვირგვინდა.
„ამ დღეს მსოფლიო პატრიარქმა დიმიტრიოსმა პატრიარქ ილია II-ს გადასცა ავტოკეფალიის აღიარების სიგელი და კათოლიკოს-პატრიარქის ტიტულის ცნობის სიგელი. ეს იყო ჩვენი ეკლესიის დიდი გამარჯვება და ისტორიული მოვლენა,“ – აღნიშნა მიტროპოლიტმა.
მან განსაკუთრებული მადლობა გადაუხადა სრულიად საქართველოს კათოლიკოს-პატრიარქ ილია II-ს მისი ღვაწლისთვის და უსურვა ჯანმრთელობა, დღეგრძელობა და სულიერი სიმტკიცე.
ქადაგების დასასრულს მიტროპოლიტმა შიომ ყურადღება გაამახვილა იმ მნიშვნელოვან იუბილეზეც, რომელიც წელს აღინიშნება – საქართველოში ქრისტიანობის სახელმწიფო რელიგიად გამოცხადების 1700 წლისთავზე.
მისი თქმით, მართლმადიდებელი სარწმუნოება ყოველთვის იყო ქართველი ერის სულიერი საყრდენი და მისი გადარჩენის საფუძველი.
„შევთხოვოთ უფალს, რომ ჩვენი ერი მომავალშიც დარჩეს ერთგული ქრისტეს ეკლესიისა და მართლმადიდებელი სარწმუნოების, რომელიც არის ჩვენი უმთავრესი საუნჯე და ჩვენი არსებობის საფუძველი,“ – აღნიშნა მიტროპოლიტმა.
ქადაგების დასასრულს მან მორწმუნეებს კიდევ ერთხელ მიულოცა მართლმადიდებლობის ზეიმი და დალოცა საქართველო და ქართველი ერი.
„ღმერთმა დალოცოს ჩვენი ქვეყანა და ჩვენი ერი. ღმერთმა გაგაძლიეროთ. ჩვენთან არს ღმერთი,“ – განაცხადა საპატრიარქო ტახტის მოსაყდრემ.
მართლმადიდებელ ჟურნალისტთა კავშირი წერდა, ინდოეთში წმინდა ქეთევან დედოფლის სახელობის მუსიკალური ფესტივალი „ქეთევანი“ გაიმართა.
