უნგრეთი ევროკავშირს ქრისტიანობისა და ტრადიციების შეტევაში ადანაშაულებს
ევროკავშირის ფორუმმა რელიგიური „ანტიფემინისტური“ ჯგუფების აღზევების შესახებ გააფრთხილა და გენდერული და ლგბტქ+ მოძრაობების დაცვისკენ მოუწოდა.
2025 წლის 13 ივლისს, უნგრეთის მთავრობის წარმომადგენელმა მკაცრად გააკრიტიკა ევროკავშირი და მას ქრისტიანობის გავლენის შელახვისა და ევროპაში ტრადიციული ღირებულებების განადგურების მცდელობაში დასდო ბრალი. ამის შესახებ Christianity Daily იტყობინება.
მინისტრმა კომისარმა ბერნადეტ პეტრიმ სექსუალური და რეპროდუქციული უფლებების შესახებ ევროპის საპარლამენტო ფორუმის (EPF) ანგარიში გააკრიტიკა, რომელშიც რელიგიური „ანტიფემინისტური“ ჯგუფების აღზევებაზეა საუბარი. მისი თქმით, ბილ და მელინდა გეითსის ფონდისა და ჯორჯ სოროსის სტრუქტურების მიერ დაფინანსებული დოკუმენტი მორწმუნეების წინააღმდეგაა მიმართული.
„ეს ანგარიში ღიად ანტიქრისტიანული ნაშრომია. ის საფრთხეს წარმოადგენს, რადგან ჩვენ ტრადიციულ ღირებულებებს ვიცავთ და რადიკალურ გენდერულ და ლგბტქ+ მოძრაობებს ვეწინააღმდეგებით“, - თქვა პეტრიმ.
მან დასძინა, რომ ეს „კიდევ ერთი დასტურია იმისა, თუ როგორ ტოვებს ევროკავშირი რწმენას“. მისი თქმით, ქრისტიანობა საუკუნეების განმავლობაში ევროპული საზოგადოების საფუძველი იყო: „ქრისტიანული ღირებულებები ყოველთვის უზრუნველყოფდა ადამიანებს განათლებით, მზრუნველობითა და ოჯახის მხარდაჭერით“.
პეტრიმ ასევე ეჭვქვეშ დააყენა ანგარიშის ავტორების მოტივები: „მე მჯერა, რომ მათ ეშინიათ მათი, ვისაც ღმერთის, ოჯახის, ქვეყნისა და ტრადიციების სწამს. და ჩნდება კითხვა - რატომ ეშინიათ ამის?“
ანგარიშში მისი სახელი შეტანილი იყო სავარაუდო „ექსტრემისტული ქსელის“ სიაში, რომელიც პროგრესულ ღირებულებებს ემუქრება. ამაზე პეტრიმ უპასუხა: „როდესაც ჩემი სახელი ამ სიაში დავინახე, სიამაყეც კი ვიგრძენი. ეს ნიშნავს, რომ რაღაცას სწორად ვაკეთებ. არაეფექტური რომ ვყოფილიყავი, არ შევიყვანდი. მაგრამ თავად მიდგომა - ქრისტიანობის დამცველების „შავ სიებში“ მოხვედრა - უკვე დიქტატურაა“.
ანგარიშში ასევე ნახსენებია ADF International, ქრისტიანული ადამიანის უფლებათა დამცველი ორგანიზაცია. მისმა დირექტორმა პოლ კოულმენმა Hungary Today-ს განუცხადა: „EPF გვესხმება თავს, რადგან ჩვენი ადამიანის უფლებათა დამცველი საქმიანობა ეფექტურია. ჩვენ ვიცავთ სიცოცხლეს, მშობლების უფლებებს, სიტყვის თავისუფლებას და სხვა ფუნდამენტურ თავისუფლებებს“. მან დასძინა: „რაც უფრო მეტად ცდილობენ ჩვენს გაჩუმებას, მით უფრო ნათელი ხდება, რომ ჩვენი საქმიანობა ცვლილებებს იწვევს - ევროპასა და მის ფარგლებს გარეთ“.
უფრო ადრე, მჟკ-მა დაწერა ბუდაპეშტში ევროკავშირის ელჩებთან ერთად გამართულ გეი აღლუმზე, რომელიც ხელისუფლებამ აკრძალა.
