გელათის აკადემიაში დავით აღმაშენებლისადმი მიძღვნილი ფილმის ჩვენება გაიმართა
ღონისძიებას წიგნების პრეზენტაცია და ტრადიციული გალობა ახლდა.
გელათის სამონასტრო კომპლექსის აკადემიაში გაიმართა ფილმის ჩვენება, რომელიც ასახავს საქართველოს დიდ მეფესა და წმინდანს — დავით აღმაშენებელს. დოკუმენტური ფილმი „დავით აღმაშენებელი, მესიის მახვილი“ მიტროპოლიტ იოანეს ლოცვა-კურთხევით შეიქმნა და მაყურებელს მეფის ცხოვრების მთავარ ეპიზოდებსა და ღვაწლს აცნობს.
ღონისძიების ფარგლებში მოეწყო წიგნების პრეზენტაციაც. დამსწრე საზოგადოებას წარედგინა სამი ახალი გამოცემა:
„გელათი სამეფო მონასტერი და საძვალე“
„დავით აღმაშენებელი, მესიის მახვილი“
„წმინდა კეთილმსახური მეფე თამარი“
სამივე წიგნი მეუფე იოანეს ლოცვა-კურთხევით დაიბეჭდა. მათი ავტორია პროფესორი ლევან ტყეშელაშვილი, რომელმაც სპეციალურად ამ საღამოსთვის ისაუბრა ისტორიული კვლევების მნიშვნელობაზე.
შემოქმედებითი ღონისძიება ქუთაის-გაენათის ეპარქიის ტრადიციული გალობის სტუდია „სიხარულით“ დასრულდა. გუნდმა რამდენიმე საგალობელი შეასრულა, რაც საღამოს განსაკუთრებულად საზეიმო ატმოსფეროს მატებდა.
გელათის მონასტერი XII საუკუნეში დავით აღმაშენებელმა დააარსა. საუკუნეების განმავლობაში იგი საქართველოს საგანმანათლებლო და სულიერი ცხოვრების ცენტრი იყო. გელათის აკადემიას „მეორე იერუსალიმსაც“ უწოდებდნენ, ხოლო თავად მონასტერი დღემდე იუნესკოს მსოფლიო მემკვიდრეობის ძეგლთა ნუსხაშია შეტანილი.
მართლმადიდებელ ჟურნალისტთა კავშირი წერდა, აკაკი წერეთლის უნივერსიტეტში სამეცნიერო კონფერენცია ჩატარდა.
