საქართველოს თავდაცვის ძალებში სამხედრო მოძღვრის დღე აღინიშნა

სამხედრო მოძღვრის დღე საქართველოს თავდაცვის ძალებში. ფოტო: საზუ

საქართველოს თავდაცვის სამინისტროს „არმიჰოლში“ ახალი მთავარი სამხედრო მოძღვრის, დეკანოზ გურამ ჭარელაშვილისა და კაპელანების შეხვედრა გაიმართა.

ღონისძიებაზე სიტყვით გამოსვლისას საქართველოს თავდაცვის მინისტრის მოადგილემ, გრიგოლ გიორგაძემ, ყურადღება კაპელანის ინსტიტუტის გაძლიერებასა და საქართველოს საპატრიარქოსთან ნაყოფიერი თანამშრომლობის მნიშვნელობაზე გაამახვილა.

შეკრებილ სამხედრო მოძღვრებს სრულიად საქართველოს კათოლიკოს-პატრიარქ შიო III-ის მისალოცი წერილი საქართველოს კათოლიკოს-პატრიარქის მდივანმა, დეკანოზმა მიქაელ ბოტკოველმა, გააცნო.

კაპელანებს სიტყვით მიმართა მთავარმა სამხედრო მოძღვარმა, დეკანოზმა გურამ ჭარელაშვილმა. სამხედრო კაპელანის მსახურების განვითარებაში შეტანილი წვლილისთვის ყოფილ მთავარ კაპელანს, დეკანოზ დავით ლონდარიძეს, მადლობის სიგელი გადაეცა.

ღონისძიებას საქართველოს თავდაცვის ძალების მეთაურის მოადგილე, გენერალური შტაბის უფროსი, გენერალ-მაიორი ჯონი ტატუნაშვილი და უწყების თანამშრომლები დაესწრნენ.

წმინდა გიორგი ჭყონდიდელის ხსენების დღესთან დაკავშირებით, თავდაცვის სამინისტროს ტერიტორიაზე მდებარე მთავარანგელოზის სახელობის ტაძარში საღვთო ლიტურგია დეკანოზებმა დავით ლონდარიძემ და გურამ ჭარელაშვილმა აღასრულეს.

სამხედრო მოძღვრის დღისადმი მიძღვნილი ღონისძიებების ფარგლებში, ასევე გაიმართა ლექცია-სემინარი, რომელზეც სამხედრო მოძღვრებმა კაპელანთა გამოცდილება და მსახურების ძირითადი მიმართულებები განიხილეს.

მართლმადიდებელ ჟურნალისტთა კავშირი წერდა, „ჯარის ბანაკს“ ახალი საგანი – „ღირებულებითი განათლება“ დაემატა.

წაიკითხეთ ასევე