პატრიარქმა პორფირემ საქართველოს ეკლესიას ქრისტიანობის 1700 წლისთავი მიულოცა
„სერბეთის მართლმადიდებელი ეკლესია განსაკუთრებული აღტაცებითა და ძმური პატივისცემით შესცქერის საქართველოს ეკლესიის მრავალსაუკუნოვან, მამაც გზას“ — აღნიშნა სერბეთის ეკლესიის წინამძღვარმა მილოცვაში.
პეჩის მთავარეპისკოპოსმა, ბელგრად-კარლოვცის მიტროპოლიტმა და სერბეთის პატრიარქმა პორფირემ საქართველოში ქრისტიანობის სახელმწიფო რელიგიად გამოცხადების 1700 წლისთავთან დაკავშირებით საქართველოს მართლმადიდებელ ეკლესიას, მის წინამძღვარსა და ქართველ ხალხს მისალოცი სიტყვით მიმართა.
სერბეთის ეკლესიის წინამძღვარმა საიუბილეო თარიღის სულიერ და ისტორიულ მნიშვნელობაზე გაამახვილა ყურადღება და საქართველოს ეკლესიას სერბეთის მართლმადიდებელი ეკლესიის სისავსის სახელით ძმური სიყვარული და მხარდაჭერა დაუდასტურა.
„ამ ღირსშესანიშნავ დღეს, სერბეთის მართლმადიდებელი ეკლესიის სისავსის სახელითა და პირადად ჩვენი სახელით, გულითადად გილოცავთ ამ დიდ მოვლენას“, — აღნიშნავდა პატრიარქი პორფირე.
მილოცვაში მან საქართველოს ქრისტიანულ ფესვებზე, ყოვლადწმინდა ღვთისმშობლის მფარველობასა და მოციქულთასწორ წმინდა ნინოს მისიონერულ ღვაწლზე ისაუბრა. პატრიარქმა გაიხსენა მეფე მირიანისა და ქართველი ხალხის ქრისტიანულ სარწმუნოებაზე მოქცევა და აღნიშნა, რომ ქრისტიანობა საქართველოს სახელმწიფოებრივი და სულიერი ცხოვრების საფუძვლად იქცა.
სერბეთის პატრიარქმა განსაკუთრებული ყურადღება დაუთმო საქართველოს ეკლესიის მრავალსაუკუნოვან ისტორიას და იმ განსაცდელებს, რომელთა მიუხედავადაც ქართველმა ხალხმა მართლმადიდებლური სარწმუნოების ერთგულება შეინარჩუნა.
„სერბეთის მართლმადიდებელი ეკლესია განსაკუთრებული აღტაცებითა და ძმური პატივისცემით შესცქერის საქართველოს ეკლესიის მრავალსაუკუნოვან, მამაც გზას ამქვეყნიური ისტორიის მშფოთვარე მდინარებაში“, — ნათქვამი იყო მისალოც სიტყვაში.
პატრიარქმა პორფირემ მოწიწებით მოიხსენია თბილისის ასი ათასი მოწამე, რომლებმაც წმინდა ხატების დასაცავად სიცოცხლე შესწირეს. მან ასევე ხაზი გაუსვა წმინდა მეფეების — დავით აღმაშენებლისა და თამარის — ღვაწლს და აღნიშნა, რომ მათი მმართველობის დროს საქართველომ სახელმწიფოებრივი ძლიერებისა და სულიერი განათლების მწვერვალს მიაღწია.
„ღრმა მოწიწებით ვიხსენებთ თბილისის ასი ათასი მოწამის გმირობას, რომლებმაც წმინდა ხატების დასაცავად საკუთარი სიცოცხლე შესწირეს“, — აღნიშნავდა სერბეთის ეკლესიის წინამძღვარი.
საქართველოს კათოლიკოს-პატრიარქისადმი მიმართვისას პორფირემ ლოცვითი თანადგომა გამოხატა და ქართული ეკლესიის წინამძღვარს სამწყსოს მსახურებისა და სახელოვანი წინამორბედების საქმის გაგრძელებისთვის გაძლიერება უსურვა.
„გულწრფელად ვლოცულობთ, რათა კვლავაც განაგრძოთ თქვენს მწყემსმთავრულ მზრუნველობას მინდობილი სამწყსოს ერთგულად მსახურება და თქვენს სახელოვან წინამორბედთა წმინდა საქმეების გაგრძელება“, — ნათქვამი იყო მილოცვაში.
პატრიარქმა განმარტა, რომ წინასწარ აღებული ვალდებულებების გამო მცხეთასა და თბილისში გამართულ საზეიმო ღონისძიებებზე პირადად დასწრება ვერ შეძლო, თუმცა საქართველოს ეკლესიასთან ევქარისტიული ერთობა და ლოცვითი თანამონაწილეობა დაადასტურა.
„გარწმუნებთ, რომ ჩვენი ევქარისტიული ერთობა და მხურვალე ლოცვები ამ საერთო სიხარულშია ჩაქსოვილი. ისინი მოწმობენ რწმენასა და სიყვარულში იმ ერთობას, რომელიც ქრისტეში განუყოფლად გვაკავშირებს“, — აღნიშნა მან.
სერბეთის პატრიარქმა მოკითხვა გადასცა საქართველოს ეკლესიის მღვდელმთავრებს, სამღვდელოებას, მონაზვნებსა და მრევლს, ასევე ქვეყნის პრეზიდენტს, პრემიერ-მინისტრსა და ხელისუფლების წარმომადგენლებს. მან ხაზი გაუსვა საქართველოს მრავალსაუკუნოვანი სულიერი და მატერიალური ფასეულობების შენარჩუნების საერთო პასუხისმგებლობას.
მილოცვის დასასრულს პატრიარქმა პორფირემ საქართველოს ეკლესიის წინამძღვარს ჯანმრთელობა, მხნეობა და ხანგრძლივი სიცოცხლე უსურვა, ქვეყნის ხელმძღვანელობას — სიბრძნე და სიმამაცე, ხოლო ქართველ ხალხს — მშვიდობა და კეთილდღეობა.
„შევთხოვთ უფალს, ქვეყნის სახელმწიფო ხელმძღვანელობას მიანიჭოს სიბრძნე და სიმამაცე ქვეყნის მართვის საქმეში, ხოლო მთელ საყვარელ ქართველ ხალხს — მშვიდობა, კეთილდღეობა, წინსვლა ყოველ კეთილ საქმეში და ზეციური მადლის უხვი გარდამოსვლა“, — აღნიშნავდა სერბეთის პატრიარქი.
მართლმადიდებელ ჟურნალისტთა კავშირი წერდა, 15 ივლისს ბელგრადში საერთაშორისო კონფერენცია გაიმართა.
