ზღუდერის ისტორიული ეკლესია განადგურდა
VI საუკუნის კულტურული მემკვიდრეობის ძეგლის ადგილზე ახალი ტაძრის მშენებლობა მიმდინარეობს; სააგენტოს ცნობით, სამუშაოები უნებართვოდ განხორციელდა.
გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნული კვლევითი ცენტრი ქარელის მუნიციპალიტეტის სოფელ ზღუდერში მდებარე ისტორიული ეკლესიის განადგურების ფაქტს ეხმაურება და აცხადებს, რომ კულტურული მემკვიდრეობის მნიშვნელოვანი ძეგლი სრულად არის დანგრეული.
ცენტრის ინფორმაციით, ზღუდერის ეკლესია VI საუკუნის სამნავიან ბაზილიკას წარმოადგენდა, რომელიც X და XIV საუკუნეებში გადაკეთდა. მიუხედავად იმისა, რომ ძეგლი საბჭოთა პერიოდში ნაწილობრივ დაზიანდა, მას კულტურული მემკვიდრეობის უძრავი ძეგლის სტატუსი ჰქონდა და ადრეული შუა საუკუნეების ქართული არქიტექტურის მნიშვნელოვან ნიმუშად მიიჩნეოდა.
განცხადების თანახმად, ისტორიული ნაგებობის ადგილზე ამჟამად თანამედროვე მასალებით ახალი ეკლესიის მშენებლობა მიმდინარეობს. ცენტრი აღნიშნავს, რომ ძველი ეკლესიის დანგრევა ჯერ კიდევ გასულ წელს მოხდა, თუმცა ინფორმაცია საზოგადოებისთვის ცნობილი მხოლოდ ახლა გახდა.
„ძეგლის დანგრევა და მის ადგილას ახალი მშენებლობის დაწყება მოხდა უნებართვოდ“, — აღნიშნულია კულტურული მემკვიდრეობის დაცვის ეროვნული სააგენტოს განცხადებაში, რომელიც 14 ივნისს გავრცელდა.
სააგენტოს ინფორმაციით, მისი მონიტორინგის სამსახურმა სოფელ ზღუდერში, წმინდა გიორგის ეკლესიის ნანგრევებზე ახალი ტაძრის უნებართვო მშენებლობის ფაქტი გასულ წელს გამოავლინა. უწყების ცნობით, სამუშაოების შეჩერების მოთხოვნით წერილობით მიმართეს რუის-ურბნისის ეპარქიას, ხოლო ვითარების შესახებ ინფორმაცია საქართველოს საპატრიარქოსაც მიეწოდა, როგორც ძეგლის მესაკუთრეს.
ჩუბინაშვილის ცენტრი მიიჩნევს, რომ მომხდარი კულტურული მემკვიდრეობის დაცვის სფეროში არსებულ სერიოზულ პრობლემებზე მიუთითებს და სახელმწიფოს მხრიდან ისტორიული ძეგლების დაცვის პოლიტიკის გაძლიერებას საჭიროებს. ორგანიზაცია ასევე ხაზს უსვამს მსგავსი შემთხვევების შესახებ საზოგადოების დროული ინფორმირების აუცილებლობას, რათა შესაძლებელი გახდეს ეფექტიანი და ფართო რეაგირება.
მართლმადიდებელ ჟურნალისტთა კავშირის ცნობით, რუსული თავდასხმის შედეგად კიევ-პეჩერის ლავრას მიძინების ტაძარს ხანძარი გაუჩნდა.
