მიხეილ ყაველაშვილი ზემო აჭარაში ახალნათელღებულთა დალოცვას დაესწრო

საქართველოს პატრიარქი შიო lll და საქართველოს პრეზიდენტი მიხეილ ყაველაშვილი. ფოტო: მიხეილ ყაველაშვილის ფეისბუქ გვერდი

საქართველოს პრეზიდენტი მიხეილ ყაველაშვილი 25 ოქტომბერს ზემო აჭარაში სრულიად საქართველოს კათოლიკოს-პატრიარქ შიო III-ის მიერ ახალნათელღებულთა დალოცვის ცერემონიას დაესწრო. პრეზიდენტმა საყოველთაო ნათლობა ქვეყნის სულიერ ცხოვრებაში მნიშვნელოვან მოვლენად შეაფასა და აღნიშნა, რომ მსგავსი მასშტაბის ნათლობა საქართველოში მრავალი წლის განმავლობაში არ ჩატარებულა.

„ეს დღე ჩვენი ქვეყნის სულიერ ცხოვრებაში მნიშვნელოვანი მოვლენაა — ასეთი მასშტაბის საყოველთაო ნათლობა საქართველოში მრავალი წელია არ ჩატარებულა“, — განაცხადა მიხეილ ყაველაშვილმა.

პრეზიდენტმა ზემო აჭარის ისტორიულ და სულიერ მნიშვნელობაზე გაამახვილა ყურადღება. მისი შეფასებით, ეს მხარე ქართული ქრისტიანული ცივილიზაციის უპირველესი კარიბჭე და სულიერი მემკვიდრეობის გამორჩეული ადგილი იყო, რომელმაც უმძიმესი ისტორიული განსაცდელების მიუხედავად შეინარჩუნა თვითმყოფადობა, რწმენა და სამშობლოსადმი ერთგულება.

„ის, რომ სწორედ ამ მიწაზე ქადაგებდნენ ქრისტიანობას ანდრია პირველწოდებული და სიმონ კანანელი, დღევანდელ დღეს განსაკუთრებულ მნიშვნელობას ანიჭებს“, — აღნიშნა საქართველოს პრეზიდენტმა.

მიხეილ ყაველაშვილმა საყოველთაო ნათლობის მნიშვნელობა საქართველოში ქრისტიანობის სახელმწიფო რელიგიად გამოცხადებიდან 1700 წლის იუბილეს დაუკავშირა. მისი თქმით, ეს მოვლენა კიდევ ერთხელ წარმოაჩენდა სარწმუნოების ადგილს საქართველოს ეროვნულ ცნობიერებაში და მართლმადიდებელი ეკლესიის მრავალსაუკუნოვან წვლილს ხალხის სულიერი ერთიანობისა და ეროვნული იდენტობის შენარჩუნებაში.

„ამ მემკვიდრეობის დაცვა და მომავალი თაობებისთვის გადაცემა ჩვენი საერთო პასუხისმგებლობაა“, — განაცხადა მიხეილ ყაველაშვილმა.

პრეზიდენტმა საქართველოს რეგიონების ტრადიციების, კულტურისა და თავისებურებების მნიშვნელობაზეც ისაუბრა და აღნიშნა, რომ მათი მრავალფეროვნება ქვეყნის ეროვნულ საფუძვლებს ამდიდრებდა და განამტკიცებდა.

„მჯერა, რომ ჩვენი რეგიონების მრავალფეროვანი ტრადიციები, კულტურა და ხასიათი კიდევ უფრო ამდიდრებს და განამტკიცებს ჩვენს ეროვნულ საძირკველს. ზემო აჭარის დღევანდელი სიხარული კი მთელი საქართველოს საერთო ზეიმია“, — აღნიშნა მან.

ახალნათელღებულთა დალოცვის ცერემონიას მიხეილ ყაველაშვილი ოჯახთან, საქართველოს პარლამენტის თავმჯდომარესთან, აჭარის მთავრობის თავმჯდომარესა და საკანონმდებლო და აღმასრულებელი ხელისუფლების წარმომადგენლებთან ერთად დაესწრო.

პრეზიდენტმა სრულიად საქართველოს კათოლიკოს-პატრიარქ შიო III-ს ამ მნიშვნელოვანი სულიერი მოვლენის აღსრულებისთვის მადლობა გადაუხადა და ახალნათელღებულებსა და მათ ოჯახებს მიულოცა.

„მადლობას ვუხდი სრულიად საქართველოს კათოლიკოს-პატრიარქს, შიო III-ს, ამ მნიშვნელოვანი სულიერი მოვლენის აღსრულებისთვის. ვულოცავ ყველა ახალნათელღებულს და მათ ოჯახებს ამ განსაკუთრებულ დღეს. ღმერთმა დალოცოს ჩვენი სამშობლო, ჩვენი ეკლესია და ქართველი ხალხი!“ — განაცხადა მიხეილ ყაველაშვილმა.

მართლმადიდებელ ჟურნალისტთა კავშირი წერდა, 25 ოქტომბერს პატრიარქი შიო III ხიჭაურში საყოველთაო ნათლობას აღასრულებს.

წაიკითხეთ ასევე