გალობის უნივერსიტეტში ილია II-ის ხსოვნას პატივი მიაგეს

პანაშვიდი დეკანოზმა დავით თავაძემ აღავლინა. ფოტო: გალობის უნივერსიტეტი

21 ოქტომბერს გალობის უნივერსიტეტის სტუდენტებმა, აკადემიური და ადმინისტრაციული პერსონალის წარმომადგენლებმა სიონის საკათედრო ტაძარში პატივი მიაგეს უწმინდესისა და უნეტარესის, სრულიად საქართველოს კათოლიკოს-პატრიარქის, ბიჭვინთისა და ცხუმ-აფხაზეთის მიტროპოლიტის, ილია II-ის ხსოვნას.

კათოლიკოს-პატრიარქის საფლავზე პანაშვიდი გალობის უნივერსიტეტის ასოცირებულმა პროფესორმა, დეკანოზმა დავით თავაძემ აღავლინა. ღვთისმსახურებაში მონაწილეობდნენ უნივერსიტეტის საბაკალავრო და სამაგისტრო პროგრამების სტუდენტებისგან შემდგარი გუნდები.

პანაშვიდს დაესწრნენ უნივერსიტეტის ადმინისტრაციის ხელმძღვანელი ნანა გოთუა, პროფესორ-მასწავლებლები და ადმინისტრაციული პერსონალის წარმომადგენლები.

გალობის უნივერსიტეტის ისტორია 2006 წელს, სრულიად საქართველოს კათოლიკოს-პატრიარქ ილია II-ის ლოცვა-კურთხევით დაიწყო. მისი განსაკუთრებული მზრუნველობითა და მხარდაჭერით დაარსებული უმაღლესი სასწავლებელი ქართული ტრადიციული მუსიკის, მრავალსაუკუნოვანი საგალობლებისა და ხალხური სიმღერების დაცვას, განვითარებასა და მომავალი თაობებისთვის გადაცემას ემსახურება. უნივერსიტეტი ამ მემკვიდრეობის პოპულარიზაციას საერთაშორისო მასშტაბითაც უწყობს ხელს.

უნივერსიტეტის წარმომადგენლებმა მადლიერებით გაიხსენეს ილია II-ის ღვაწლი საქართველოს ეკლესიისა და ქვეყნის წინაშე, ასევე მისი განსაკუთრებული წვლილი ქართული გალობისა და ტრადიციული მუსიკის შენარჩუნების საქმეში.

მართლმადიდებელ ჟურნალისტთა კავშირი წერდა, ეპისკოპოსმა ვახტანგმა ილია II-ის საფლავთან პანაშვიდი გადაიხადა.

წაიკითხეთ ასევე